前排同朋友去赤柱嘅時候見到兩個年輕人玩緊雜耍，一開始不以為意，回程嘅時候發現兩位個樣望落好細個，佢哋好努力咁教緊小朋友如何上手。我感覺係香港玩雜耍嘅人唔算多，於是上前邀請兩位分享一下。
1. 你地係幾時開始接觸雜耍？
H: 我小學已經開始有接觸，當時學校有校隊，我有參加過唔同比賽，去到中學雖然都仍然有校隊但我無參加，我會自己私下練習，同埋有時同其他愛好者一齊研究花式同埋表演心得。
I: 我都係小學開始就有接觸，之後就一路玩落去，中學同大專都有 keep 住玩。
2. 點解你地會選擇赤柱向大眾去分享呢個興趣嘅？
其中一個原因係小朋友多啲。其實我地都有試過其他地方例如旺角同尖沙嘴，但呢啲地方大人多過小朋友，而且本身已經好多街頭藝人，大家未必留意到我地。好多時小朋友因為好奇心就會想過來試過來玩，我地都想將呢項運動嘅年齡層推低啲。
我地而家每逢禮拜六都係赤柱，講真我地都係試下，我地計劃左幾個月，做一啲基本估算，買物資，預計路人嘅反應，最後我地選擇左赤柱。我地係到除左希望推廣雜耍外，仲會賣轉碟同埋我地嘅課程。
K: 咁你地覺得係呢到擺檔幾次反應點呢？
反應比我地預期中好，好多人都有興趣想試呢項活動。
K: 咁擺檔期間有無遇到啲路人嘅負面反應呢？
H: 有的，有試過路人問我係咪讀唔成書所以出來擺檔，又問係咪讀書好差所以要咁？聽到個下其實好錯愕，點解會有人有咁嘅想法。
I: 有試過唔少次係個小朋友好想試，但家長唔想，拉走仔女，內心都會覺得可惜㗎。不過當然亦有成功案例，係我地到初次認識雜耍，買左道具返屋企之後練習，家長拍片分享俾我地知道成果。
3. 雜耍係香港唔算非常普及，有咩原因令你地堅持落去呢？
I: 我自己本身好享受表演嘅過程，當我成功練到某啲新花式嘅時候又會好有滿足感。
I: 我覺得我而家做嘅嘢唔單純為錢。當你要被逼做一啲唔鍾意做嘅嘢，有錢你都未必開心。
我覺得我而家養活到自己加做到享受做嘅嘢好開心。
H: 由我細個開始接觸雜耍，其實我掌握得唔錯。我父母一開始都唔係好支持我出來幫手擺檔，因為我都住得遠的，但我想用自己能力幫補下屋企。當屋企人知道其實成件事都安全，就放心左好多，呀爸仲話如果有咩事立刻打俾佢。有屋企人支持，我可以安心做我鍾意嘅事。
4. 兩位都咁年輕，唔知你地有咩目標呢？
H: 我好想好想係單車方面發展多啲，所以我希望用自己能力賺錢再買一部單車，等我有更好嘅裝備去練習同比賽。
I: 我短期嘅目標係希望去世界多啲國家表演。而長期目標係期望自己嘅花式同技巧可以更上一層樓。
後記：作為一個老師，訪問期間我有觀察 Ivan 教小朋友嘅過程，係佢細心，有耐性嘅教導下，好多當日第一次接觸雜耍嘅小朋友都立刻上手。訪問過後係 Ivan Instagram 見到佢係台灣表演嘅片段真心覺得佢好厲害。祝願兩位年輕人可以繼續為自己夢想努力奮鬥。
有興趣了解更多嘅讀者可以係 instagram search and like “hkjugglerivan” 了解更多。
有故事的人 Story Teller | Kenry Lee 