唔知大家見到水水第一眼嘅感覺係點呢？當時我一見到水水覺得好治癒，尤其係加埋憂鬱森林系列嘅配色，成幅話好靚。究竟點解會有水水呢個角色？我地今次搵左水水嘅作者水水，同我地分享。
1. 你創作水水嘅靈感係？
一開始只係隨便畫出長耳形狀嘅公仔，只係似兔仔，但我從來冇定義佢係咩生物，只叫佢做水水。
大概係細個第一隻收到嘅毛公仔係兔仔，由細個到中六都會畫兔仔，可能受兔嘅形狀影響，潛意識影響下演變到而家嘅水水有長耳嘅特徵。2018 年我遇上一個情緒低潮期，創作左憂鬱森林系列，個陣嘅水水好瘦。而我有位老師觀察到我畫嘅水水好反映到我嘅情緒，例如肥嘅時候代表我開心，瘦代表傷心。我都好認同呢樣嘢，水水好多時都可以幫我梳理情緒，借助水水反映自己心情。
以冷色為主調其實只係一個習慣，亦同我性格有關吧。另外，藍綠色係治癒嘅顏色，所以我會比較多用。
K: 點解你嘅品牌叫做《動力神社》嘅？
其實水水本身係太空飄浮，後來太空衣無能量，佢發現附近有座神社飄浮，接駁後提供所需能量，於是降落到星球上面。寓意動力可以無中生有，休息過後就可以再出發。
2. 由你發現自己情緒低潮到創作水水嘅過程係點嘅呢？
其實創作水水係一個自我發現嘅過程。
創作嘅過程令我了解自己更多。中學嘅我可能 40% 了解，到而家因為創作嘅關係，了解差唔多有 70% 吧。
中學時期嘅我有時都有情緒，但我覺得每逢畫畫我都覺得好放鬆，所以我大學都選擇左讀視覺藝術，從而開始做創作。
我嘅第二份工作令我壓力幾大，加上一連串嘅社會運動，令我情緒遇到脆弱期，既有壓力，又會有時覺得驚恐。
因為本身有畫開畫，起心情低落嘅時候就會畫畫，到2017年就創作左水水。2018 年係我情緒問題開始嚴重嘅起點，放空後就畫咗憂鬱森林嘅插畫。2019年嘅時候，情緒走向下坡，睇咗一段時間藝術治療後，對情緒嘅領悟更多，更加肯定咗我做動力神社嘅創作同品牌理念。
3. 水水係你面對不同情緒嘅時候擔當住咩角色呢？
最主要當然係令我更認識自己嘅情緒，可以俾我有個渠道抒發我嘅感受，不過其實好多時我都係作品不自覺咁反映左自己嘅諗法。
水水亦係一個陪伴者，成長嘅過程好多時我都係自己一個，所以水水就好似我朋友咁。
4. 關於情緒健康，你想講嘅係？
我覺得係要學識求救。當你覺得自己長時間情緒好低落的話，真係要去尋求幫助。
有時候可能我地遇到嘅分享者唔合適，但千其唔好放棄，繼續搵合適嘅人去分享。
同埋唔好一來就標籤左自己有咩問題，好多時可能我地都會有盲點，所以我地先要聽下其他人嘅睇法，然後再睇下點樣幫自己。
K: 咁你就自己嘅故事，當你遇到情緒低潮期時，你點樣接受呢樣嘢呢？
初初我覺得自己無咩問題的，但身邊朋友同我傾計嘅過程有問我會唔會同屋企人有關，後來見過心理醫生同埋藝術治療師之後，我更加了解自己嘅情緒，亦接納自己。
5. 你希望借助水水傳達咩訊息？自己又有咩目標呢？
第一當然係分享我自己嘅故事，希望大家見到我嘅作品之後都可以了解多啲如何同不同情緒共處。除左幫助情緒低落嘅人外，我希望大眾見到我嘅作品都可以認識多啲，亦對於精神健康呢樣嘢有多點同理心，希望可以了解同明白多啲。
好多時其實我都係市集同人面對面溝通，分享自己創作意念，好多人都係我地傾計嘅過程更加了解我作品背後嘅訊息同想法。
目標的話，我仲希望可以有自己嘅繪本，會朝呢個方向努力。
後記：而家好多時我地都提及精神健康，越來越多人關注呢個議題，其實亦有好多方向俾我地去幫助自己，最重要係我地願意踏出個一步。
有興趣了解更多水水作品嘅讀者可以 search and like Instagram “littoral_hyacinth” 或 “動力神社” Facebook page。
有故事的人 Story Teller | Kenry Lee 