前言：唔知大家有無見過微縮模型呢？印象中細個嘅時候成日都會見到，當時已經覺得手工非常厲害。前排係 Kelena instagram 見到 Justianian 送俾佢嘅作品，覺得佢手工非常精細。究竟如何透過一個玻璃瓶說故事？今次請到 Justianian 同我地分享。
1. 可以簡單介紹咩係微縮模型嗎？
微縮模型係將現實或者幻想畫面按比例縮細，製作出日常縮影，係一種紀錄生活或者表達思想既特別方式，我常用比例包括1/150, 1/87, 1/64。
2. 一開始你係點樣接觸呢項興趣呢？點解之後諗到以玻璃瓶呈現故事？
細細個就喜歡微小既玩具，例如果啲迷你士兵，亦因為爸爸係讀藝術，可能有啲藝術觸覺遺傳,到左出嚟做野開始有能力買鐵路模型公仔，就開始真正接觸微縮模型，之後學埋砌景，但因為空間有限想法太多，一直都諗緊一種又可以保存得好又可以係有限空間展示既方法，直至有一日見到一啲廚房食物儲存瓶，我叮一聲，不如試吓將啲微縮景塞入去!
結果效果幾好，可以保存之餘又可以360 度呈現作品
3. 做微縮模型令你最享受嘅地方係？
除咗微縮模型之外我仲鐘意影相，兩者既共通點都係紀錄事情同定住某啲時刻。
我好享受由搜集資料開始到設計製作整個過程，係呢個過程自己想點整就點整，好享受創作嘅自由同感覺，亦都係一個工作以外既放鬆，做微縮自己一定要定要靜丫嘛。
4. 透過玻璃瓶說故事嘅心得同挑戰？
因為要係有限空間搵自由，好多時都要有取捨，但我自己有三樣嘢會堅持：一感覺、二畫面、三技術。
我係感覺行先，每一個故仔都要有溫度同意境，有左感覺先唔會比人覺得啲野係堆砌出嚟，例如要整一家人就要比到人溫馨愉快嘅感覺，呢樣就要由畫面去實踐，個腦要有畫面，一家人做緊乜嘢呢？ 小朋友好開心玩緊？ 係咩地方呢？ 不停問自己好多問題直至有畫面出黎就可以動工，呢個時候就要用自己自學番黎嘅技術去實現畫面，配色、擺位、裝燈等等。
技術係最大挑戰因為你腦入面有無限大既畫面，但到落手你就會知一係整唔出個感覺，一係技術要再研究, 往住花最多時間都係呢度。
5. 暫時整過難度最高嘅瓶係？需時幾耐呢？
有三個比較深刻：
* 電視廠景瓶子，我係電視從業員，一直以黎都係想整自己嘅工作環境出黎，呢個花左一兩個月去籌備，做左半個月左右，實在太多細微野要做，例如要製作廠機，燈，搞到啲燈可以著等。而最大挑戰係因為自己太熟果個環境，好多時都唔滿意，人哋覺得OK 啦 但我依然執著。
* 香港綠色小販檔街景，香港故事嘅瓶子亦都係我一直想做既嘢，爸爸係一個鑑證家收藏家，成日都聽到佢講各種香港故事,，我又生於香港好想做番一啲大家都有共嗚既主題，呢個瓶子難度在於點樣可以營造氣氛同有大量微縮物件要製作，都花左我一兩個月。
* 忍者龜下水道，我一直都想多用身邊日常生活嘅物料去製作，有日拎起個用完嘅廁紙筒突然叮一聲係咪可以有所作為呢 ？結果用測試性質試下結果又掂喎！ 加個燈仔落去更加有感覺。
6. 你提過呢個係業餘興趣，相信製作一個玻璃瓶耗時唔少，你點樣平衡正職同副業呢?
我從事電視業，不定時工作，我同自己講搵到份自己鍾意嘅興趣又有人欣賞，辛苦啲堅持下，有時收夜番到去如果唔係太攰都會做一陣，不過一開始就會不知不覺做夜左，哈哈。每日做啲做啲，積小成多又一個作品。堅持好緊要，但自己鐘意都好緊要。
後記：說故事有好多方法，可能好似我咁訪問，或者係透過歌聲，戲劇或者影相表達，但不論咩媒介都好，學 Justinian 講：
要有靈魂，要形神兼備，
咁樣先可以感動讀者。
有興趣了解更多Justinian 作品嘅讀者可以 search and like Facebook 「瓶中事」或 Instagram “miniature story”。
有故事的人 Story Teller | Kenry Lee 