前言：唔知大家笑點高唔高呢？有一種人嘅職業就係要氹人笑，佢哋就係好多時係派對見到嘅小丑。一個「平凡」文員點解無啦啦會夢想做小丑？今次搵到小丑米米分享佢嘅故事。
1. 可以介紹一下小丑嘅工作嗎？一般人對小丑嘅工作有無咩誤解？
小丑係一個不能在家工作既職業。
主要既工作係透過簡單既互動中令人好直接得到好純粹既快樂。
一般人對小丑有好多既誤解…
可能有好多電視電影都有恐怖小丑既主題，大家都會對小丑有個刻板印象⋯曾經有個商場表演，有個婆婆行過來我側邊鬧我「化到咁既樣，嚇死人」，當時經驗唔多啦，然後我呆一呆⋯我扭左支氣球花講「我送比你呀」之後佢攞完就急急腳走左。
其實小丑可以好可愛。
2. 點解你會想做一個小丑? 一開始選擇入行嘅時候身邊人有咩反應呢？
我初初其實唔係想學做小丑，係純粹想搵野學下，咁就上網咩都睇下，之後見到泰國小丑團，用小丑既快樂推廣自己國家— 泰國呢個地方。
我睇完覺得好powerful，所以就想試下做。
初初做小丑身邊人會好好奇，佢地會唔明白點解好地地一個女人會畫花個面去表演，或者屋企人會驚外人會唔知點睇我。
K: 咁你點解堅持到自己嘅夢想？點樣克服各種心理障礙呢？
初初冇人睇好我做表演，屋企人又好怕鄰居見到我唔知點睇。我都有好氣餒架，同埋我有份正職要兼顧，但一直見到師父同大師兄係身邊支持，所以我有堅持。
直至我係泰國攞左獎，就開始係香港有不同公開演出機會，咁就叫屋企人嚟睇，佢地漸漸了解同接受，仲睇得好開心。後來仲有新聞同電視訪問，佢地既朋友反應又幾正面，慢慢佢哋就接受左同開始支持我。
3. 如果年輕讀者有興趣入行可以點做？或者點樣裝備自己呢？
想入行其實好簡單，只要有一顆善良既心。
可能你地會覺得做小丑一定要有好多技能，扭氣球、魔術、雜耍等等⋯但其實呢幾樣野都只係幫助緊你去做你既唯一目標— 就係令人開心。
只要你想令人開心，你就會研究好多方法，就會變成一個習慣，一個世界觀。
想學做小丑其實網上都可以搵到坊間有好多小丑課程，但每個都有唔同特色，教既都會唔同。我師父同我都有開過小丑班，有興趣可以問下我地。
4. 你係其他訪問提及過「我覺得自己係未做小丑前係一個平凡人」，相信好多人都會覺得自己「好平凡」，你可以以過來人身分同其他迷茫嘅年輕讀者分享嗎？
有人話每一個人出世既時候都係一張白紙，但其實白紙可以係圓形，亦可以係方形或者其他形狀。
每個人都有啲野係獨一無二。學習欣賞自己，你會發現自己本身原來擁有好多寶藏。
同埋有啲野雖然好老土，但好岩嘅就係：唔試行第一步，真係唔會知道自己可以行得有幾遠。
我師父曾經講過：有教無類。我地唔係要搵有天份既人去教，而係教既時候我哋都係「分享快樂」。
Give and take
5. 你曾經係其他訪問提過「好難令香港人笑」，係唔如意嘅 2020年，小丑米米有無咩說話想同香港人講?
哈哈，香港人望落好似好冷漠，但係其實只係我地由細到大都唔習慣開口評論人，讚賞其實都係評論既一種，大家不妨多啲讚賞，唔好吝嗇。
2020年，做人已經好難，做香港人更加難。人係群體動物，好似爬山咁，一個人行好難，但如果知道自己身邊有人一齊爬，一齊行其實又好似會冇甘辛苦，大家行多一步試下同身邊氣餒既人講聲加油，等對方知道大家一齊行緊
香港人加油呀！
6. 你做小丑嘅目標係？
小丑米米目的係令全世界笑。
難，但我會努力做
後記：自己唔算經常係派對遇到小丑，但其實小丑要用渾身解術令在場人士笑，真係一啲都唔簡單。下次如果見到小丑，可以好似米米咁講，多啲讚賞同鼓勵。2020 年對於好多香港人嚟講都係唔如意嘅一年，特此以小丑米米嘅故事作今年最後一個故事，希望大家新一年可以「笑多啲」。
有興趣了解更多嘅讀者可以 search and like Facebook page “小丑米米-Rice Rice the clown” + Instagram @rice_rice_the_clown。
有故事的人 Story Teller | Kenry Lee 