前言：唔知大家有無係社交媒體上成日見到一幅圖上面有兩隻白色好似燈泡嘅公仔同一句簡單語錄呢？佢哋都係 Isabelle 嘅作品。我自己成日都會分享 Bulbble Inc. 嘅語錄，因為每日簡單一句，為我地帶來好多提醒。兩個小燈泡究竟點出世嘅呢？今次請 Isabelle 同我哋分享。
1. 你係大學時期先開始創作 Bulbble Inc. 兩隻角色？知道 Bulbble 係指 light bulb 同 bubble，靈感來自？
或者我可以講少少自己背景先，其實我細細個已經開始畫畫，但可能係畫下無聊公仔，例如火柴人。我中學會考無讀視覺藝術的，因為覺得要靠呢科入大學好似有啲風險，但我有 keep 住畫畫，同埋我鍾意將啲嘢擬人化。考完會考已經知道自己想讀動畫，所以最後我揀左浸會大學 Digital graphic communication。
至於點解會創作咗Bulbble Inc.呢？其實當時係準備緊 final year project，但好多 idea 都好似唔夠好咁，最後有一晚 brainstorm 緊嘅時候望住檯燈，然後有個 idea 叮一聲出現，就好似有個燈泡係個頭上面咁，擬人化畫下，慢慢就創作左 Bulbble Inc.啦。
點解係泡泡同燈泡呢？我成日都覺得燈泡象徵住希望，when there is light, there is hope。至於吹泡泡係我哋細個會玩嘅，充滿開心回憶，我希望可以將正能量好似泡泡咁隨風傳俾唔同人。
唔知大家有無聽過 Hello Kitty 無嘴嘅原因係因為原創人唔想讀者嘅情緒受影響，所以我初期創作都會為兩個角色「泡泡」同「大牙」加笑臉，因為我想讀者見到我嘅作品會開心，到而家我就會畫唔同表情，因為我覺得要開始學習面對自己所有嘅情緒。
2. 一開始點解會諗到用語錄呈現作品？我知道你係創作上為自己定咗一個每日目標，可以分享下嗎？
其實我大學畢業之前已經開始咗營運我嘅 Facebook 專頁，當時定落每日都要畫一幅畫，係因為想自己保持住創作，唔好因為惰性影響咗，而家已經變成咗一個習慣，我知道有啲讀者亦會期待我每日嘅作品。以前試過可能夜咗上載，會有人私訊我問點解今日無上載。
我一路都好鍾意記低唔同嘅語錄，讀書時期有試過畫畫加語錄送俾屋企人同朋友鼓勵佢哋，所以就嘗試創作更多。唔知大家有無留意到好多語錄通常只有字，或者背景圖片同文字不符，所以我想創作一套屬於自己嘅語錄系列。
3. Bulbble Inc.嘅作品治癒咗好多人心，佢哋喺你生命擔任嘅角色係？
介紹下先，其中三隻角色分別係泡泡，大牙同埋旺財 (年獸)。佢哋係我嘅朋友，陪伴住我經歷唔同情緒，我哋互相陪伴同支持。
當然有時候我都會心情唔好，但係透過畫畫我嘅負面情緒可以得以釋放，畫畫係讓我沉澱嘅時間。
4. 做文字創作係香港感覺唔值錢，圖文創作係你眼中係點嘅一回事？
所有創作都係無價的。
其實以前我屋企都想我做一個專業人士，好在最後佢哋都俾我自由選擇鍾意讀嘅科同埋做嘅野。
我想講嘅係，做創作嘅人都可以好叻，都可以賺錢養活自己。
我相信好多藝術家創作都唔係只係為錢，仲有對藝術嘅熱愛，因為如果只係為錢嘅話應該好快會轉行。
我自己覺得將來好多工作都可以被機械人取代，但創作比較難。因為創作者嘅感情都會好影響到自己嘅作品，我哋會透過自己嘅創作影響其他人。
5. 有無一兩件讀者因為見到 Bulbble Inc.作品分享嘅深刻故事？
其中一樣好深刻嘅當然係我同讀者交換聖誕卡。讀者們真係非常有心思，佢哋寫到密密麻麻，睇完真係好感動。例如有啲讀者會分享佢哋點樣透過我嘅作品去渡過人生嘅低潮。
另外唔同嘅小故事都令我印象好深刻，例如曾經有馬來西亞嘅讀者嚟到香港旅遊，知道我擺市集所以特登嚟搵我。另外，有一個住喺美國嘅讀者每年都會訂購我嘅年曆，每逢訂購年曆嘅時候我都會見到佢個名。
呢啲亦都係我做圖文創作開心嘅地方，因為我可以透過我嘅作品去聯繫唔同人。
6. 好多人都因為 Bulbble Inc. 嘅作品得到力量，有咩說話想同 2020 年嘅香港人講？
我會話係：「活在當下，隨心而行。」
其實2020 年其中一個教導我哋嘅地方就係人生有好多不能預計嘅事情會發生，與其只係擔心，不如嘗試喺逆境之中做多啲令自己開心嘅事，嘗試聆聽自己嘅心同埋好好享受生活。
低谷嘅日子總會過去，所有嘢都會好起來。希望大家經過今年都會更加懂得珍惜眼前人，因為所有嘢都可以好脆弱。
7. 係你眾多作品，邊張係你嘅最愛？點解呢？
我而家有大概一千六百幾張畫，講真我全部都鍾意，真係要揀的話，
我會揀: “Say yes to new adventure”，我覺得我哋需要時刻提醒自己有呢一個想法，隨時準備好迎接新挑戰。
後記：認識 Bulbble Inc. 嘅作品應該有大約五年，好多時生活遇上一啲煩惱巧合地 Isabelle 都好似及時開解咗我咁，所以我好鍾意係社交平台分享 Bulbble Inc. 嘅插畫。訪問過後，Isabelle 問我有無好喜歡嘅語錄，最後我揀咗呢句：”Don’t be afraid of being different”，共勉之。
有興趣了解更多嘅讀者可以 search and like Instagram “bulbbleinc”。
想睇吓 Bulbble Inc. 最新作品《人生是美好的》，同埋其他周邊產品可以瀏覽：www.bulbbleinc.com
有故事的人 Story Teller | Kenry Lee 