前言：大約係一兩年前已經知道南丫島上有一間玻璃製作工作坊，當時留意到工作坊舉行日期只限十一月到五月，一直未搵到機會但記左係心入面。前排終於有機會參與玻璃製作，完成作品後我邀請咗導師 Alice 分享佢嘅故事。
1. 可以分享下 Selling Point 工作坊嘅背景嗎？
其實我紮根係南丫島已經超過二十年。一開始 Selling Point 係一間賣手工藝製品嘅店鋪，當然有我自己嘅作品啦，一年之後我加入左工作室大概八年時間。之後我有兩年時間將工作室搬到屋企天台，後來我再搬落地舖，就係而家嘅 Selling Point 啦，已經運作左快 9 年。
K: 由賣嘢到開工作坊開班，點解會有呢個轉變嘅？
賣嘢嘅時候其實好多時都有機會同客人接觸，而我自己都鍾意同人傾計，加上偶爾都有客人問我會唔會有工作坊，所以我就開始教班。初期都係私人班，後期先定期咁教班。
2. 你係幾時開始接觸燒玻璃藝術呢？
其實二十幾年前我已經接觸 fusing 融合技術，當時係香港並唔常見。機緣巧合下我有機會去台灣進修，係外國買書返來自學，之後進展到買個熔爐返來自己試啲 technique。
K: 你本身係咪藝術出身呢？點解會對玻璃咁著迷？
我本身係 graphic design 出身的，其實好耐以前係電視見到玻璃製作嘅時候已經鍾意，之後有機會嘗試過後，覺得呢樣嘢唔係離自己咁遠。
其實由台灣進修返來，到我真正教班，講緊係 10 年嘅時間，我要儲錢，又要做資料搜集，例如係選擇點樣嘅工具或者係選購一個點嘅爐，有好多嘢都要去研究。
3. 玻璃藝術最吸引你嘅地方係？挑戰係？
我覺得玻璃呢樣嘢好特別，當你接觸製品嘅時候冷冰冰，但個製作過程其實溫度好高，所要求嘅技術好高，亦非常多變。
挑戰第一樣嘢一定係溫度，因為個熔爐好熱。
另一樣嘢當然係要同時間競賽，因為你動作要好快，如果唔係又要加熱。呢樣藝術好容易失敗，所以好講求即時反應。
4. 製作玻璃係咪非常講求默契？因為好似全部都多過一個人先整到？
係的！
其實玻璃製作都可以自己一個做，不過當遇上一啲複雜嘅動作或技巧嘅時候就需要多啲人幫手，所以需要默契的。我地呢到嘅導師都係玻璃製作嘅愛好者，佢哋除左幫我教班，亦會係呢到練習。
5. 點解你會選南丫島開 studio? 最後覺得呢個地方點呢？
我當然本身好鍾意南丫島，我覺得呢到帶俾人一個好輕鬆嘅節奏，令我覺得唔想係市區返工，所以我就想係呢到開舖，其實我從來無諗過會走到咁遠。
一開始點解叫 Selling Point 呢？我見南丫島好似無咩屬於自己嘅產品，所以想用玻璃製品成為南丫島嘅 selling point，亦當然意思係我呢間舖頭有賣點啦。其實以前開舖頭賣嘢個陣生意都唔錯，因為玻璃製品係香港唔算普及，好多遊客都會好奇，亦鍾意呢類藝術品。
我應該係香港第一間既教玻璃吹製，亦同時賣自己作品嘅店鋪，而家市面應該有四間玻璃吹製工作室。
係南丫島發展左咁多年，我仍然好鍾意呢到，有時候遊客偶爾經過發現我地就好似有個驚喜咁。
其實我都試過係市區開工作坊，但感覺完全不同，係市區參加者可能係放工嚟，有啲人可能放工好攰，無咩心機參加，但去得南丫島嘅多數都係放假，心態都唔同啲。
K: 玻璃吹製以前係香港咁唔普及，其實你一開始決定係呢方面發展有無猶豫呢？
就係無人做你先有機會！
其實一切都係緣份呢，個陣我有啲心動想試，剛好朋友問我有無興趣用平租係南丫島開舖，咁我就開始咗喇，都無咩諗太多。
6. 你試過製作一個製品最長係幾耐時間呢？最難嘅位係？
係一隻玻璃碟，我試左 7-8 次都失敗。當時我嘅工具唔足夠應付我想製作嘅作品，最後我都係慢慢嘗試，最後就成功。呢件作品我由製作到上色整左差不多一個月。
7. 如果讀者有興趣認識多啲，甚至入行，係香港有咩途徑呢？
其實係外國好多大學例如美國、台灣、日本都有同玻璃藝術有關嘅學士課程。香港呢，以我所知，只有浸會大學視覺藝術系嘅工作坊同埋市面嘅工作坊。
要入行當然要有基本藝術觸覺，但我覺得一開始唔識啲技巧唔緊要，因為係要不斷學習同練習。
後記：朋友同我都認同今次嘅玻璃吹製係特別而且良好嘅體驗，導師們細心講解基本上大家都有能力完成作品。工作坊旁邊有幾個玻璃櫃擺放住 Alice 嘅作品，好多都令我同朋友嘖嘖稱奇，因為覺得作品未免太複雜！如果有興趣去 Selling Point Glass Workshop 體驗的話可以瀏覽：www.sellingpoint.com.hk，記得要預約呀，Alice 啲班好爆！
有故事的人 Story Teller | Kenry Lee 