前言：之前分享 GRM 師妹西瓜嘅故事後，我嘅大學同學 Katrina inbox 我，話想分享30歲 gap year嘅故事。Katrina 俾我嘅感覺係學霸同埋一個好鍾意泰國嘅女仔，大學期間同畢業後 Katrina 不斷都有新嘗試。我地成日都話踏出安舒區難，今次睇吓Katrina 點樣面對離開安舒區。
1. 我知道你同我一樣都 take 左一個 gap year，可以分享下你嘅經歷嗎？
其實我二十八歲嗰陣已經開始諗gap year，然後我就開始儲錢，同埋計劃下點用呢年嘅時間。我有幾樣嘢想做，就係讀碩士，係泰國住一段時間，同埋嘗試係其他地方居住。
碩士我報左一間英國大學嘅課程，上課模式好彈性，只要五年內完成就可以，我唔一定要留係英國，我只要偶爾飛去英國就滿足到畢業要求。
我去到泰國唔想就咁 hea 時間，所以就去左聯合國教科文組織到做義工，學到好多嘢。
計劃好有 gap year，但過程我係有啲 go with the flow 的，例如我中間有緣份係大埔慈山寺返工，作為佛教徒嘅我有呢個機會實在好難得。
受前男友影響，我曾經都係一個好有計劃嘅人，同佢分開之後，我其實搵返自己，一個本身都幾即興嘅自己。
我而家成日都會同其他人講做生意可以 lean start up，不斷 trial and error，其實人生其他方面都係，唔需要每步規劃好曬先行，其實有時我地想做嘅嘢唔係離我地咁遠。
2. 其實你以前都係唔怕轉變嘅人。當年你大學係由哲學系轉到地理系，點解有個咁嘅決定？
其實我JUPAS 最初係想揀香港大學嘅社會科學系，不過當時我知道自己唔夠分，所以就選擇左中文大學嘅哲學系。我自己其實好鍾意呢科，而且都讀得唔錯，但呢科實在要求幾高，而且真係想透徹明白的話其實有好多課外閱讀，我覺得自己有啲好似牛嚼牡丹咁，我想要多啲時間去消化，唔想求其讀。我見中學時期我嘅地理讀得都幾好，所以就嘗試轉去地理系。
K: 但你畢業後係從事 marketing 嘅工作，又係點解呢？
其實我由中學開始已經係 “take the less traveled path”，我鍾意發掘新嘅事物。其實我嘅成績係容許我繼續讀上去，不過前男友嘅關係，令我想發掘下商界。
雖然有時候我都會諗如果當日我選擇左一條安穩啲嘅路的話，我嘅生活可能會更好，但我好慶幸自己有選擇不一樣嘅路。
3. 我記得大學時期你都成日會提及泰國，點解你咁鍾意泰國嘅？
我前男友係泰國人，而我同泰國嘅緣份由中學識呢個前男友開始。
我覺得泰國俾人一種好舒服好開心嘅感覺，好多泰國人亦好友善。大家可能唔知，但泰國人其實係生活上好有創意，例如而家大家見到某啲泰國廣告都會覺得印象好深刻。
K: 我知道你之前有一段時間旅居泰國，同你期望之中嘅體驗有無唔同呢？
以前去旅行對泰國基本上只有正面評價，我覺得係泰國生活係好嘅，但到我係個到返工其實都有啲衝擊，因為香港實在係太有效率啦，個邊相對係比較 chill 同埋無咩要求，因為泰國上游機會唔多，大家都唔算特別積極。
4. 你覺得你性格上邊個特質成就左今日嘅你呢？
我覺得我個人係比較有創意，同埋唔怕嘗試。以前中學讀書就會被標籤為「反叛」或者「唔聽話」，我呢種性格去到大學反而有好評，因為好多時我嘅 term paper 都會帶來驚喜，因為我唔係咁因循守舊。當然唔係話我有創意就唔使努力，但我個重點會係點樣做好份 paper，而唔係點樣拎 A。
後記：
Katrina最愛睇建築設計，拜訪有趣嘅創作人。言談間總覺得文化界經營好困難：介紹創意點子嘅平台好多，但講到實戰營運，通常都係靠自己跌跌撞撞摸住石頭過河。有見及此，Katrina創立咗 ”AuntieKat文創碎碎唸" 用訪談形式記錄文創人的實戰學習血淚經驗。同時，亦介紹一啲有用嘅平台/工具/資訊。有興趣嘅讀者可以瀏覽:
Instagram: storyteller_kenry
有故事的人 Story Teller | Kenry Lee 