#88 Ron Lee | 攝影師 – 有故事的人 Story Teller

前言：最近添置咗航拍機嘅我多咗留意其他航拍攝影師嘅作品，偶然係 Instagram 發現 Ron 嘅帳戶，佢除咗係一個攝影師之外，更加係一個 YouTuber。剛踏入 24 歲嘅 Ron 希望透過 YouTube 頻道更立體咁傳遞自己嘅想法，一齊睇吓佢嘅故事。

Ron 直言以前係香港無咩接觸攝影，原因係以前 Ron 認知嘅攝影師形象都係「龍友」或者好「薯」，大概 2016 / 17 年左右，興起一股旅遊攝影師嘅熱潮，當時係英國讀書嘅 Ron 係網上見到好多攝影師嘅作品，覺得佢哋嘅風格有別於以前認識嘅攝影師，受到啟發下就想嘗試接觸攝影。

一開始當然無咩認識，帶住新買嘅傻瓜機就去冰島旅行，旅程中遇到 Ron 其中一個好鍾意嘅外國攝影師 Sam Kolder，傾談下更加令 Ron 想係攝影方面做好啲，於是就上網睇多啲學多啲。

問 Ron 點解攝影同製作短片咁吸引佢，佢希望透過呢兩樣媒介說故事，而 Ron 係 YouTube channel 嘅短期目標係要推出旅遊影片，希望各位讀者同佢一齊見證住。

Ron 分享暫時試過最長用一個月去研究影片過場，需要嘅時間好取決於片段嘅內容。Ron 話由以前讀書年代，不斷 trial and error，上網睇唔同作品，亦有不同攝影產品投資，先令自己擁有而家嘅經驗。

Ron 曾經係短片分享過，擁有自己嘅 YouTube 頻道係佢一直好想做到嘅事，佢係大學畢業返香港後終於開始營運自己嘅頻道。問Ron 做 YouTuber 嘅現實同想像有無落差，佢覺得無咩唔同，但想同讀者分享，要準備一段好嘅影片真係要用好多時間，尤其係佢第一段片。

「我對自己嘅片好高要求，係不同方面都希望完美，例如運靚同調色咁，想讀者覺得有種 epic 嘅感覺」。

Ron 分享，意想不到嘅係有機會同唔同品牌合作，有啲更加係無諗過咁快就會搵自己合作。

問 Ron 遇到 haters 如何面對，Ron 覺得目前haters 唔算話好誇張，Ron 唔會去正面回應，但如果留言者提出嘅建議係有道理的話，Ron 會直接係下一段片改善建議嘅部份。

Ron 希望透過自己嘅作品可以令讀者對攝影產生興趣，因為佢都係因為咁而接觸攝影。Ron 亦希望自己嘅 YouTube 頻道可以做得更出色，期望多啲人支持先會帶來唔同嘅機會。Ron 亦想去返某啲以前去過嘅地方，例如冰島同法羅群島，用更成熟嘅攝影技巧影低唔同美景。

問 Ron 有咩同年輕讀者分享，佢鼓勵：

「大家趁細個多啲發掘自己嘅興趣，我覺得無嘢係做唔到，係睇你幾想做到件事，同埋你有幾堅持」。Ron 自己亦會向旅遊攝影師呢個夢想繼續努力。

後記：訪問當日我約 Ron 一齊去影航拍，聽 Ron 仔細嘅講說，你會感受到佢對攝影嘅熱誠。年紀雖少，目標好遠大。

Ron 話希望遲啲推出網上攝影教學課程，有興趣嘅讀者可以期待下。

有興趣嘅讀者可以瀏覽 Ron 嘅YouTube channel: Ronlee97 同 Instagram: ronlee97_