前言：唔知大家有無儲開某類玩具？係咪由細個已經鍾意嘅玩具呢？今次訪問嘅有故事的人細個開始已經好鍾意車仔玩具，而家仲擁有自己嘅玩具品牌，今次搵到好有香港特色嘅微影玩具創辦人 Steve同我地分享。
經歷人生起跌 創立自己品牌
Steve 好細個開始已經鍾意車仔，因為爸爸以前係一個汽車銷售員，所以會收到好多舊車，細細個嘅 Steve 已經坐過好多車，亦對唔同車嘅牌子有認識。
Steve 坦言以前從來無諗過擁有自己嘅品牌。以前嘅佢只係想快啲大學畢業，搵份穩定工作。縱然係咁，Steve 一直好清楚自己鍾意畫畫同設計。
而家擁有自己品牌嘅 Steve，其實 2014 年曾經諗過宣佈破產。「以前曾經好成功嘅 eBay 生意，2011 我結束咗，到 2013 歐債危機真係對我好大影響」。當時 Steve 決定將最後嘅儲蓄賭一鋪，投放咗係 3D printing 到，生產咗第一套情景模型，亦係呢套情景模型扭轉咗劣勢。「當時嗰套模型好受歡迎，我地亦搵到一個潛在市場，於是就向呢方面發展」。雖然遇到好多困難，Steve 從來無諗過放棄玩具呢個行業。
微影人車景 盛載香港故事
問 Steve 點解品牌叫微影，Steve 希望品牌可以透過不同玩具將不同人、故事、影像記錄。
Steve 分享咗幾樣同微影粉絲嘅有趣事。其中一次 Steve 比較深刻係有巴士保育團體嘅粉絲將一架真嘅熱狗巴士駛咗入去會展展場，到訪嘅人除咗可以買微影玩具之餘，亦感受一下巴士嘅實物。Steve 話成件事好熱血，因為好多人都為咗呢件事成真而好努力。「以前有搭過熱狗巴嘅人就會明白，當我地係會場入面開引擎，個陣汽油嘅味道，加上大家一齊係個 hall 到追巴士，真係好正」。
訪問中 Steve 提及微影有令香港人多咗留意身邊嘅事物，例如微影出咗啲唔係太多人認識嘅車仔，好似天文台車，好多粉絲都會同返 Steve 講出街嘅時候會留意多啲路面情況，睇吓遇唔遇到呢架車。
所有產品一絲不苟 由零開始
其中一件 Steve 最滿意嘅作品係勝利 2 型巴士。呢個心血結晶用咗3年半準備，由 2017 年開始準備，2020 年尾出。Steve 好自豪咁話「近乎完美」！
「我地真係要搵返一架同型號巴士，由影相，度尺，留意巴士細節，我地要不斷修正，又要用模型玩具同真嘅巴士做對比，座位，樓梯，我地真係差不多做到一模一樣，可以話係前無古人，後無來者」。
呢架巴士只係其中一個例子，Steve 訪問當日仲有提及準備其他產品時所花嘅功夫同埋製作過程嘅要求，例如天星小輪，同埋小販檔嘅人仔其實係用咗屋企人嘅樣貌。
希望打造令人感動嘅品牌
問 Steve 最希望香港人見到微影產品時嘅感受，佢希望微影係一個令人感動嘅品牌。
「其實我哋而家已經向呢個方向進發緊，我哋好多嘅產品都同香港人嘅故事同回憶有關係」。
Steve 介紹產品目錄嘅時候話微影主打創新，佢哋嘅產品目錄超過200頁，只有少過八樣產品係同其他品牌重複。
「我哋唔跟風，唔抄襲。同埋我哋係由設計到銷售都係一條龍，好處就係我哋唔受其他人嘅限制，有產品想做就會去做，就算有時一啲冷門啲嘅車我哋嘅銷售點仍然可以支持到，我地希望將不同人嘅故事都呈現到」。
後記：訪問當日 Steve 分享咗好多故事，從唔同嘅片段都會知道微影呢個品牌係如何將香港人嘅故事同情呈現，亦明白點解佢地會咁受歡迎。如果要搵一件代表到香港嘅產品，微影一定係其中之一。唔知微影嘅產品有無邊樣同你哋嘅成長有密切關係呢？
有興趣了解更多嘅讀者可以瀏覽 Instagram @hktiny 或 Facebook Tiny 微影 香港玩具及模型品牌 或 YouTube “Tiny 微影 official”。
有故事的人 Story Teller | Kenry Lee 