前言：呢位有故事的人係細妹介紹俾我，佢話有一位同學畢業後無做社工，開咗間鼓勵人獨處嘅 cafe。聽到呀妹嘅介紹，已經覺得個意念好特別，所以就約 Sophia 見面。究竟 Heart in Place 係一個點嘅地方呢？
一個獨處空間
Heart in Place 係只俾一人預訂嘅 cafe，鼓勵大家留時間俾自己。
問 Sophia 點解想創辦一個獨處空間，佢覺得獨處無壞處，而香港呢個地方無咩俾人獨處嘅空間，係 Heart in Place 人客可以有個地方俾自己嘅思緒沉澱，亦係一個容納到悲傷嘅空間。
「呢個城市需要呢個空間，我自己都需要呢個空間」。
Sophia 16 歲開始已經想擁有自己嘅 cafe，而家總算係夢想嘅開始。好多客人都鍾意Heart in Place呢個地方，會同Sophia 分享自己嘅想法或感覺。Sophia 覺得有時客人未必係分享自己嘅故事，而係係將到訪後最直接嘅感覺講出來。
認定自己目標，打造有靈魂的空間
高材生讀完三大嘅社工學系，無好似其他同學咁「搵份好工」，選擇自己闖蕩，一啲都唔容易。「我屋企一開始都反對㗎，我預左佢地一定反對，所以我先斬後奏，裝修好曬我先同屋企講」。Sophia 分享讀完四年社工系，覺得自己唔係十分認同社工見 case 嘅理念，所以毅然放棄做社工。
「我係屋企突然搬走咗部鋼琴都嚇親我媽咪」，Sophia 話身邊好多人都覺得單獨開 cafe 唔 work，但 Sophia 仍然決定一試！Sophia 話屋企人而家偶爾都會上去幫手打掃下，唔想佢得自己一個咁辛苦。
放棄一條容易啲嘅路，Sophia 要返好多兼職儲錢、有去 cafe 打工、要學點沖咖啡同埋整甜品、同埋用心為 cafe 做準備。
「我希望呢到係一間有靈魂嘅 cafe」。
入到去 Heart in Place，唔係行「打卡」路線嘅 cafe，簡單白色嘅裝修，其中一面牆有兩個月亮，有 Sophia 準備餐飲嘅地方、一部鋼琴、一張望到街外風景嘅長檯、寫信俾自己嘅區域、可以閱讀嘅空間，每個人都可以有一個專屬嘅獨處空間。
掌控獨處時間，隨心渡過幾小時
Sophia 希望人客去到 Heart in Place 有咩感覺呢？
「客人會去感受自己」。
有客人來到只係呆望天空，佢以為咁樣好奇怪，但原來係 Heart in Place 會搵到好多「怪人」。
係呢到我好想有種隨心嘅感覺，等人客擁有真正嘅 me time。我呢到有啲隱藏嘅小巧思，人客如果有緣亦有用心，留意到就會知道呢啲小秘密，例如係個 menu 已經內藏玄機。
關於獨處⋯
關於獨處，Sophia 覺得好多人都無呢個習慣，「可能係無人教，或者係成長嘅環境影響，我地細細嘅時候成日叫我地要 sociable 啲」。
Sophia 大學期間去做交流生正正見到好多外國人都享受獨處，好多人都會咁做，係草地曬太陽，或者睇書，唔會覺得有咩奇怪。
「香港人好多人都無咩 me time，因為怕人地嘅目光，覺得自己「孤獨」」。
Sophia 最後分享，人需要探究真正嘅自己，有好多人可能到有某啲經歷，例如係中年危機，先開始諗自己想點，但可能有啲太遲。聆聽自己內心自己想點，應該經常都要咁做，要同自己相處。
後記：
訪問當日到訪 Heart in Place，簡單嘅佈置令我覺得好舒服。聽 Sophia 嘅分享，你會感受佢營運 Heart in Place 嘅用心。Cafe 位置唔多，如果有興趣去嘅讀者記得先同 Sophia book 位！我都好期待我之後係到嘅獨處時光。
有故事的人 Story Teller | Kenry Lee 