前言：相信大家一定聽過「寵物醫生」或「狗醫生」，但唔知身邊有無認識真正嘅狗醫生同主人呢？一次傾談得知 Esther 曾經帶過兩隻狗狗去做狗醫生，雖然 Dr. Jack 同埋 Dr. Chloe已經去咗彩虹橋，難得 Esther 樂於分享，今次俾大家更認識狗醫生嘅故事。
關於寵物醫生
我一向嘅認知以為寵物醫生主要係貓同狗，Esther 話仲有見過其他寵物例如白兔同烏龜。
Esther 覺得寵物醫生係一個媒介俾義工可以接觸到有需要嘅人士。佢分享如果探訪對象係小朋友的話，就會多啲時間同寵物接觸，如果係老人家的話，就可能會係一個開啟話題嘅切入點。
寵物對社會都有貢獻
問 Esther 點解一開始會帶 Chloe 同 Jack 去做寵物醫生，佢坦言係因為朋友講咗一句「你又無小朋友，只係顧住照顧狗狗，佢哋又對社會無貢獻嘅」，就係咁，Esther 想證明俾呢個朋友睇有啲嘢係兩隻狗狗做到而人未必得的。
Esther 覺得好多義工服務都係人對人，除咗性質比較單一之外，有時候又可能會出現互相比較嘅情況，佢覺得以寵物為出發點係比較中性，而且同人建立關係嘅時候亦簡單同有趣啲。
做寵物醫生要天時地利人和
想做寵物醫生都唔係咁容易，先講下寵物入選嘅條件，Esther 有提及寵物要友善、有耐性，唔可以為食同埋要健康，Esther 憶述 Jack 係一隻好鍾意同人相處同嗲人嘅狗仔，所以可以話性格決定咗寵物做唔做到醫生。Esther 話義工們都好嚴格，小至清潔，大至狗隻乖唔乖全部都會留意住。
經過嚴格遴選後，仲要睇埋飼主嘅背景，例如有時探訪地點好遠，如果係大狗的話，出入會比較麻煩，Esther 話「以前邊有咩 Uber 或者 Gogo Van，我要自己揸車去」，所以有時候寵物要去服務可能要動員屋企好多人先成事。
寵物醫生帶來快樂
問 Esther 覺得寵物醫生嘅職責係咩，佢好快就答「帶快樂俾人」。Esther 回想有次係大坑有個婆婆坐係露台到等寵物醫生去探佢，雖然只係呢個畫面，Esther 好感受到寵物醫生可以帶來嘅快樂。
Esther 探訪期間都有感受到係香港好多老人家其實係老人院生活都好枯燥，所以當有寵物醫生探訪，好多老人家都好興奮。由寵物作為引入，邀請老人家摸下，再開始同老人家傾計相處。
Esther 亦有試過去心光盲人學校做服務，「有時候有眼疾嘅小朋友某啲活動受限制，我地都係邀請佢地摸下狗仔，或者係個禮堂到拖住行下。雖然佢哋可能睇唔到，佢哋記得我地的。」義工們去到呢啲地方都會再留意多啲佢哋嘅需要。
帶寵物醫生做服務的反思
Esther 做義工後都有啲反思。例如探訪老人院後更加提醒自己身體健康嘅重要性。「有啲老人家其實年紀唔係好大，身體亦無咩大問題，就係因為腳受傷，行動唔方便所以要住老人院」，熱愛運動嘅Esther 更加提醒自己要好好照顧身體。
係服務期間 Esther 都有感香港嘅安老服務同資源真係唔足夠，所以都希望帶狗狗去做義工可以回饋返社會。
問 Esther 點解唔同人都會帶寵物去做義工，除咗做義工，Esther 分享曾經聽過一個有宗教信仰嘅人士分享，佛教相信人要「成為人」需要好多功德，希望寵物做義工幫下人可以快啲輪迴轉世成為人類。
Esther 最後分享，其實無養寵物嘅人都可以幫手，有興趣嘅讀者可以瀏覽網上群組嘅資訊，例如係 Doctor Pet 嘅專頁，或者留意下寵物展嘅資料。
後記：聽完 Esther 分享更加覺得要成為寵物醫生唔係咁容易，因為真係要脾氣好好，乖乖陪伴，呢樣實在係一個天賦。唔知有養寵物嘅讀者睇完今日個故事之後，會唔會帶寵物去試吓呢？
有故事的人 Story Teller | Kenry Lee 