前言：舊物大家會點處理嘅呢？儲起佢？掉曬佢？幼稚園嘅成績表？麥當勞開心樂園餐盒？早排係深水埗被雅俗共想門外一啲「舊物」吸引住，行入去之後發現係一個超級寶藏。今次搵到 Ricky 同我地分享舊時嘅香港。
｜開店屬無心插柳
以前做老師嘅 Ricky 有儲開舊玩具嘅習慣，大概三年前有朋友邀請佢將收藏品展覽，除咗第一次展覽，亦係咁俾出版社賞識邀請出書，記錄佢嘅收藏。「展覽到有啲人同我講話得個睇字無得買好唔過癮」Ricky 後來係朋友南昌街一間快將「交吉」嘅鋪頭到擺賣咗一陣，點知反應好好，輾轉下係呢個鋪位一年多啲，搬咗幾次，但仍然係深水埗區。
Ricky 笑言當然唔捨得賣走自己嘅收藏，所以雅俗共想嘅產品都係人地寄賣或唔要俾佢地賣，細到一張郵票，大至木櫃同大型燈牌都有得賣。問 Ricky 係咪咩產品都收，佢話所有同香港生活有關嘅物件都收，不過太大型嘅傢俬或者電器係鋪頭就真係無辦法啦。
｜不同年紀齊來尋寶
問 Ricky 咩年紀嘅人會到訪雅俗共想，Ricky 話咩年紀嘅人都有，因為除咗以前嘅物品之外，鋪頭亦有賣一啲新出嘅有創意產品。一方面好多成年人會嚟搵舊嘢，例如以前嘅公仔書同潮流文化嘢，另一方面亦有好多年輕人對以前嘅嘢好奇而到訪。
Ricky 分享呢兩年遇著香港嘅社會事件，好多人都選擇移民，移民前都會去鋪頭「帶啲嘢走」。「好多準備移民嘅人會搵一啲 97 前嘅嘢」。
｜舊時香港係好啲？
問 Ricky 覺唔覺得自己為香港文化保育努力緊，佢話咁嘅說法太漂亮。Ricky 只係希望保留一啲舊物，同志同道合嘅朋友傾計，亦希望做到教育嘅目標，俾年輕一代認識下以前嘅香港。
成日都會聽到人講「舊時香港好啲」，問Ricky 認唔認同，Ricky 話「梗係啦，我呢啲 60 後經歷過好多香港地道嘅產品，以前好多嘢都係香港製造，見證住香港工業最蓬勃嘅時期，希望年輕一代都可以認識多啲。不過我又無話覺得 new design一定唔好，最緊要係 good design」。Ricky 分享鋪頭英文名，除咗係舊物新物，佢都聚焦係有創意嘅物品，雅俗共想個想亦代表住有創意嘅構想。
後記：我自己都有儲起舊物嘅習慣，其實我仲儲起細個玩嘅玩具，同埋小學嘅成績表，去到雅俗共想印象好深刻，因為每搵到一樣寶物就會回憶下以前，同埋會不斷發現到好多有趣嘅物件。
有興趣了解多啲嘅讀者可以 search and like Instagram @goodbadcreative 或者親臨南昌街 124 號尋寶。
有故事的人 Story Teller | Kenry Lee 