前言：作為老師嘅我，身邊好多老師朋友，我亦唔係第一次訪問老師，但係今次訪問嘅係喺特殊學校教嘅 John。自問對特殊學校真係無咩認識，所以今次除咗我認知多咗之外，都希望大家日可以透過今個訪問認識多啲特殊學校嘅人同事。
｜特殊學校執教鞭不在計劃
John 係特殊學校教咗三年，莫講話特殊學校，但其實一開始佢連教書都無計劃。John 係碩士學位有讀過同音樂教育相關嘅課程，覺得自己都有興趣，之後再讀教育文憑，期間有試過音樂治療嘅工作坊，想再研究一下。
畢業之後 John 搵工，見到而家間特殊學校有空缺，於是就試下申請。「正式返工前我地有試工，當時我感覺ok，而且我遇到一個好好嘅 mentor，佢好有心，亦嘗試用唔同方法去教學生，最後我決定試下。」
｜特殊學校的教育
特殊學校如果係按照智力需要分三類，輕度，中度同嚴重智障，仲有其他特殊需要例如係聾啞人士同視障人士學校。
John 係嚴重智障人士學校教、John 分享有部分同學可以行動自如，有啲需要坐輪椅，部分郁唔到嘅同學需要長時間係床。
課室入面除咗有老師外，仲有機會有教學助理同埋家長一齊上堂。「我地無教科書，但都有課程要完成的」，John 表示係特殊學校，尤其佢係嚴重智障學校，老師們會為每堂訂立課堂目標，然後再應用教學法實踐目標。老師課堂之後會記錄低進度，但係無功課的。John 話「雖然好似好簡單，好多有心嘅老師會研究不同教學法，為唔同能力學生提供適切的學習方法」。
｜特殊教育需要班房的想像與落差
係 John 嘅班房，一堂內可能有不同突發事件，例如有同學可能會突然抽筋，或者有同學會「玩」佢嘅排泄物，遇到呢啲情況 John 都要立刻處理，「除咗教書，我地仲有啲時間照顧同學嘅基本需要」。John 除咗教書，仲要餵同學食飯，甚至係換尿片。
John 係讀書期間有修讀同音樂治療有關嘅課程，問 John 係嚴重智障學校應唔應用到，「又 ok 喎，我覺得音樂治療令我同學生嘅互動多咗，例如我帶個結他去彈有啲同學會比平時有反應，如果我播 CD YouTube 嘅音樂有啲同學平時無反應的」。
｜係特殊學校教嘅滿足感與挑戰
無咗主流學校嘅學習模式，無咗平時嘅測驗考試，John 最大嘅滿足感又係咩呢？「我覺得最大嘅滿足感係見到學生成功學識一樣嘢，因為係嚴重智障學校教書真係好大挑戰，唔係一教同學就會識」。
「有時候啲同學可能有語言障礙，但你細心觀察佢哋嘅身體語言，你會留意到佢哋想同你有互動，例如係一個笑容，或者係個同學仔拉住你件衫」。
問 John 工作最大嘅挑戰，佢覺得都係教學。如何規劃每堂，點樣教想教嘅內容，點樣去評估同學學成點都係 John 會考慮嘅重點。有時 John 都要提醒自己，係老師與照顧者兩個角色取個平衡。
｜特殊教育執教鞭的反思
問 John 係特殊學校教咗幾年，有無對自己同社會層面有咩反思，John 分享平日嘅教學需要多啲創意，「無人會同你講應該點做，為咗令我地嘅同學印象深刻啲，我地多數用情境教學，準備唔同教具令同學學得好啲」。雖然 John 提及過同學嘅學習能力未必咁高，但老師嘅準備功夫仍然要做。
John 表示疫情呢兩年令佢哋嘅學習都有影響，疫情前有好多活動，但係而家基本上無活動，只能夠留係學校舉行活動。
提到平時籌備活動，除咗基本準備，仲要細心留意好多細節。好多地方都有限制，例如有無洗手間俾同學換尿片，有無輪椅位置，呢啲嘢都係老師們要去視察環境時留意。
John 最後分享係特殊學校教嘅老師最緊要係有耐性同愛心，因為同學仔可能會有好多「突發」同「意外」，例如將碗飯掉向老師，或者係不當處理排泄物，或者最近就係不斷拉走自己個口罩，種種都需要老師們嘅耐性。John 好珍惜同學生們嘅相處，因為唔知道呢啲同學將來會點，能唔能夠照顧自己，程度無咁嚴重嘅有機會去庇護工場，但更多可能係離開學校後要長時間係醫院被人照顧。
後記：雖然之前曾經有去心光盲人院教跳舞嘅經驗，今次訪問令我更了解係特殊學校教書嘅情況同難處，如果話係主流學校教嘅老師要有使命感，係特殊學校教嘅老師比我地更大毅力，有機會大家都可以去了解更多，你嘅認識同嘗試了解可能已經幫緊呢班有需要嘅人。
延伸電影：《非同凡響》
https://www.facebook.com/…/a.18125…/1960629744229829/…
有故事的人 Story Teller | Kenry Lee 