#94 Benny | EARTH.er 創辦人

前言：暑假期間到訪大澳，係好多賣本地食品嘅鋪頭之間突然出現咗一間寫住 Global Tribe 嘅鋪頭，係門口見到賣好多唔同嘅精品，就行咗入去。入去見到好多提倡公平貿易或者對地球少破壞嘅產品，仲見到好多店主嘅旅遊相，於是就邀請創辦人Benny 分享吓佢嘅開店理念同故事。

｜EARTH.er 寄予世界公民的身份

EARTH.er 已經創立咗十年時間，Benny 分享其實以前讀書期間已經有呢個名係腦海到。EARTH 用大階係因為想提醒返所有人地球係比人更重要，.er 係地球公民嘅身份，係少我，亦希望好多對世界有使命感嘅人可以一齊為地球出一分力。

Benny 屋企幾代都住係大澳，所以 Benny 一早已經決定係大澳開舖，十年前賣本地食品嘅鋪頭林立，Earth.er 可算係當區第一間小店。

十年時間過去，鋪頭無咩改變，但係 Benny 更加清晰自己想要咩。「我本身讀 fashion design，但係 fashion 係極不環保嘅一件事，所以我希望可以將環保同時裝融合為一，減少對地球嘅破壞」。

Benny 到訪過好多東南亞國家同落後國家，學習咗當地文化外，仲認識到不同失傳咗嘅方法，例如植物染布同人手織布，呢啲都係對地球破壞少啲嘅製衣方法。「將環保同時裝融合，係我作為設計師嘅工作」。

｜尼泊爾帶來的衝擊

Benny 去過好多地方，覺得好多地方都有帶來衝擊，但其中一個對佢比較有影響嘅係尼泊爾。「咁講好似唔係幾好，但係我鍾意個到嘅落後，但係我地唔應該「鍾意」落後」。Benny 好鍾意當地文化，亦深明呢個地方嘅經濟狀況並唔係咁容易改變。「尼泊爾夾咗係兩個國家中間，當地人民無咩上游嘅空間，所以一直以來都係一個窮國家」。

身處外地，Benny 會反思係香港嘅生活，亦會將旅行感受到嘅衝擊化為設計嘅靈感。「我地係尼泊爾搵到好多失傳咗嘅製衣方法，例如係植物染布同人手織布等，希望可以將呢啲方法融入現代設計」。EARTH.er 而家有同尼泊爾婦女合作，例如係以麻線造嘅布整做袋，希望可以刺激下當地經濟之餘，麻線亦係可以自然分解嘅物料。

｜希望為到訪顧客帶來正能量

問 Benny 希望顧客去到 EARTH.er 帶走咩訊息，Benny 話其實大澳分店已經由 EARTH.er 改名為 Global Tribe，希望搵一啲有心年輕人繼承鋪頭，學下點樣營運生意，亦都想為地球出一分力。

Benny 憶述一個故事「2019 年社會事件嘅時候有啲媽媽級顧客入到嚟喊，佢哋話入到鋪頭見到年輕人奮鬥感觸落淚」。Benny 希望係呢個地方顧客可以感受到一啲溫暖，感受到世界大同，感受到個份正能量。
「我地鋪頭 9 成嘅嘢都係執返來再加工，我地想同其他人講要營造正能量唔一定要買好多嘢」。

｜EARTH.er 的願景

十年過去，Benny 而家希望專注網店嘅發展，希望將 EARTH.er 呢個品牌推廣到世界各地。
「我希望可以將香港人身份透過品牌推廣出去，例如講起日本大家會有好多正面嘅形容詞，但關於香港大家好似無咩特別嘅形容詞，如果令大家諗起 EARTH.er 都唔錯」。

Benny 最後勉勵年輕人，希望年輕讀者要有更加闊嘅世界觀，因為好多人係某啲國家或者世界大事都無咩認知。

「Dream Big，大家都要幻想多啲，但幻想只係第一步，之後你要實踐你嘅計劃」。

若果你有需要讀多啲書嘅，當然要讀，但如果你想做嘅嘢唔係特別需要讀好多書，咁就暫時唔好讀住。

後記：作為一個地理老師，我成日都會提醒同學們要關心世界發生緊咩事，要對我地嘅城市有好奇心。城市發展成日取之地球，大家又有無諗過點樣回饋返俾地球呢？

有興趣了解更多嘅讀者可以 search and like Instagram @earth.er_
EARTH.er