前言：今次呢個訪問係我一個舊同事啟發我。大概一年之前已經聽佢講話對木雕有興趣，而家仲研習緊嘅佢每個禮拜都會 update 佢嘅作品同心得，令我都想了解多啲木雕藝術係點樣嘅一回事。今次分享 Bespecial Workshop Justin 同 Vivian 嘅故事。
｜木匠與木雕藝術家大不同
可能好多人都分唔清楚木匠同木雕藝術家嘅唔同，Vivian 同Justin 分享木匠多數集中係比較實用嘅作品，如家具或者係室內裝潢，而木雕藝術家就主力裝飾性雕刻或雕塑。
*註：有興趣嘅讀者可以上網搜尋更多資訊
｜令兩位「有感覺」嘅木
Justin 以前從事平面設計，做咗超過十年嘅佢覺得唔係好搵到人生嘅意義，所以決定裸辭。剛好個陣朋友同 Justin 推薦台灣一個木雕課程，Justin 決定去試下。後來 Justin 成功搵到第二份工，公司亦好支持佢去進修，所以 Justin 斷斷續續去咗台灣三次先讀完個課程。
Vivian 雖然中學時期鍾意藝術，但當時自己無信心去發展藝術，所以大學既無選讀藝術，畢業後亦從事市場學嘅工作。之後 Vivian 因為想試下工藝設計，所以再修讀珠寶及金工設計，但覺得同金屬唔夠聯繫感覺，而珠寶種類雖好多，價值有高有低，但亦慢慢發現自己鍾意樸實溫暖嘅物料，正好木頭有呢種特質，所以開始用木頭做首飾同之後去台灣同浙江學習木雕。
｜木雕帶來嘅滿足感
兩位因為唔同原因去接觸木雕，唔知佢哋係台灣密集上堂後對木雕嘅感覺有無咩唔同。
Justin 覺得自己係一個立體感強嘅人，但因為以前平面設計嘅工作無機會發揮天賦，佢覺得接觸木雕後一啲陌生感覺都無。「有趣嘅係，好多工藝都係講啲組件放埋一齊，但木雕係減走啲嘢，既有趣亦有挑戰性。」
本身已經運用緊石同金整飾品嘅 Vivian 就覺得木雕滿足到佢嘅破壞力。「我以前成日都會整爛嘢，木雕可以話係俾我盡情發揮」，Vivian 覺得「破壞後要有建設一啲都唔簡單，收放要自如，呢個都係木雕教識我嘅道理」。
｜香港人對於木雕藝術嘅睇法
兩位鑽研木雕都有一段時間，兩位覺得今時今日香港人對木雕藝術接受程度高咗。Vivian 話以前開班無咩分享到咩係木雕，但而家 Bespecial Workshop 有研修班，係俾有意鑽研多啲嘅學員報讀，「以前無諗過同學肯由磨刀開始，而宜家嘅研修班同學係興致勃勃咁學習磨刀、認識木材，由最基礎去學習木雕概念」。
不過同其他藝術範疇一樣，Justin 覺得木雕藝術嘅價值依然受質疑嘅。「而家係多左同學報讀研修班，透過課程同學會思考木雕作品嘅價值。我地每次問佢地完成嘅大作想賣幾錢，佢地都一口話唔會賣，因為實在花左好多心血，所以會更加體會到作品背後嘅價值」。
｜挑戰自己：1 比 1 木雕柴犬
問兩位暫時最滿意嘅作品係咩，佢哋立刻話係早排雕嘅一對 1 比 1 柴犬，係佢地係木雕嘅一個里程埤。Vivian 話其實事前佢哋無整過體積咁大嘅作品，所以都唔係有十足信心，但客人就對佢哋好有信心，仲俾好大彈性兩位。Justin 話當時喺香港搵唔到老師教佢地，佢哋做咗好多資料搜集，又問過之前係台灣學木雕嘅師傅拎意見，最後用咗差不多半年完成柴犬嘅作品。而家兩隻柴犬係客人台中嘅冰店，佢哋話好多台灣人都帶住自己嘅柴犬同木雕柴犬合照。
｜建立木雕藝術風氣同文化
兩位創立咗 Bespecial Workshop，最近係大型商場參與展覽，問佢哋仲有咩目標，兩位都希望香港大眾可以更認識木雕藝術。
Vivian話教木雕唔係希望所有人都變成木雕藝術家，但希望透過Bespecial Workshop將木雕工藝同埋木頭啟發到佢地嘅生活態度分享俾大家，希望同上堂嘅同學一齊感受木雕過程嘅療癒感，同埋俾大家明白呢個係一個 manageable hobby。佢認為係香港生活節奏咁急速嘅地方，木雕可以治癒人心嘅效果更大。
Justin 同樣希望木雕藝術能夠更普及。「最基本起碼唔怕拎起把刀先」，Justin 話哪怕同學雕嘅係簡單嘅成品，過程體驗十分重要，亦希望多啲人可以分享自己係木雕嘅經歷。
Vivian 分享其實好多係 Bespecial Workshop 嘅學員都好有潛質，覺得如果可以發展一個木雕嘅 talent pool 就可以令成件事可持續咁發展落去。
後記：訪問當日去 Bespecial WorkShop，係工廠大廈突然出現一個好有質感嘅地方，兩位係訪問期間有提及「flow」呢個概念，意思係當你好投入做一件事嘅時候，你會完全沉浸係
個環境到，我相信係 Bespecial Workshop 呢到，Justin 同 Vivian 經常都會同學員們進入忘我嘅狀態，創造不同作品。
有興趣了解更多嘅讀者可以 search and like Instagram @bespecialshop 或者瀏覽 https://www.bespecialshop.com/
Bespecial Wood Carving & Woodcraft
有故事的人 Story Teller | Kenry Lee 