前言：一直係網上有留意唔同幫助流浪動物嘅組織，SAA 係其中一個，每次見到社交媒體上面可愛嘅貓狗都唔明白點解人類可以咁狠心遺棄佢哋，成日都想搵機會了解多啲，今次好榮幸邀請到 SAA 創辦人 El 同我地分享佢同埋 SAA 嘅故事。
｜盡力救助被遺棄動物
El 分享 SAA 盡力救助被遺棄動物，有時候可能係人類特登遺棄，但亦都有啲情況係主人無辦法再繼續照顧寵物例如獨居長者離世或者係寵物自己走失。El 指出偶爾有香港市民非法飼養受保護物種或者係一啲唔容易飼養嘅動物，當佢哋處理唔到嘅時候可能就選擇棄養。
「我地主要係照顧貓同狗，有少許非主流嘅寵物例如係兔仔，鱷龜同埋一隻山羊」。
K: 大家仲記得好多年前係山貝河出現嘅鱷魚貝貝嘛？當時都有人講係有市民非法飼養鱷魚，照顧唔到就隨意棄養。
｜關於寵物權益
有飼養寵物嘅主人可能都聽過香港對於保護動物嘅法例唔夠，問 El 協會進行保護工作有咩困難，佢坦言法律同人嘅觀念係最大挑戰。
「其實我地都搵到保護動物嘅條例，但執法係咪到位呢？」El 分享漁農自然護理署有三個小組負責研究相關議題，例如係教育小組或者動物權益小組，佢哋會同不同持份者商討，例如係好似 SAA呢類型嘅非牟利組織，寵物店同埋獸醫，之後再將意見同政府反映，所以已經好咗好多。
另一個困難當然係人嘅觀念，有啲人好容易就遺棄動物，例如係倉鼠呢啲售價唔高嘅寵物，如果有病的話有啲家長可能會話直接遺棄，因為醫病嘅費用比佢嘅「價值」高太多。所以身教非常重要，大眾應該教導小朋友動物嘅價值唔應該由價錢去決定。SAA 有時入學校做講座希望將呢啲正面訊息向小朋友灌輸。
｜拯救工作與遺棄情況二十年間的變化
El 覺得二十年間協會嘅工作容易咗。「我地以前出來籌錢俾人鬧㗎，啲人話我地做咩唔幫人去幫啲動物」。El 覺得教育水平進步，加上現今好多非牟利組織出現，令市民更多機會接觸保護動物嘅議題同清楚佢哋嘅工作。El 亦覺得社交媒體嘅普及令市民更加容易知道機構嘅活動，從而有更多參與。
不同機構工作咗咁多年，香港遺棄動物嘅情況有無改善呢？El 坦言情況改善咗好多。「我諗真係教育嘅成效，而家啲人睇嘢唔同咗」。El 回憶以前好多人會突然留低自己嘅寵物係 SAA 到，或者會鬧 SAA 點解唔收佢哋嘅寵物，而家市民明白機構收養都會有飽和嘅情況。
「以前好多市民，尤其係村屋居民或者車場負責人，好抗拒我地將寵物帶去絕育，其中一個原因係怕動物絕育後會唔夠惡看門口」，經過多年嘅教育，而家比較多市民願意俾機構「捕捉，絕育，放回」，又或者願意俾機構為女仔狗狗絕育，令出生率大大減低。
香港近年經歷移民潮，問 El 有無因為咁令被遺棄動物數量增加，El 同我地分享協會當年係 1997 成立就係因為遇著上一個移民潮，好多香港人遺棄寵物，El 希望幫呢啲動物。「今次我覺得好咗呀，以前啲人可能直接遺棄，但今次多咗人會問我地點樣可以帶埋寵物離開，或者應該點樣處理」。
｜人人都可以出一分力
El 認為任何年紀嘅有心人都可以為保護動物出一分力。年輕人可以運用知識去幫忙，因為好多年輕人起碼有善待動物嘅想法。
El 列舉咗好多同保護動物相關嘅方向或工作，「其實有好多方面大家都可以探索下，例如獸醫，獸醫護士，寵物店，其實寵物店需要好多專業知識的，仲有寵物美容或寵物營養學等等」，有心人當然仲可以做義工。
｜對 SAA 的目標/願景
「清零啦當然」，El 好快就回答咗呢條。「我地希望無動物再被遺棄，或者唔係特意遺棄」。
後記：SAA 已經運作超過二十年，縱然 El 覺得遺棄數目已經下降，但眼見 SAA 仲有好多待領養動物。訪問當日我有機會去參觀 SAA 嘅貓屋同狗場，我不斷地講「呢隻咁靚都無人領養？呢隻都有人遺棄？」，其實好多非寵物店銷售嘅動物都好靚好鍾意親近人類，如果大家都有意養寵物，又無特別偏好品種，記得領養代替購買，仲有記住養寵物係一生一世嘅承諾！
有興趣了解多啲或者想去探訪嘅讀者可以 search and like Instagram @saa_hk 或者瀏覽網頁 https://www.saa.org.hk/zh/index_new.php。
有故事的人 Story Teller | Kenry Lee 