#97 Chris Mak | 劍擊運動員

前言：劍擊運動員張家朗係奧運比賽奪金令多咗香港人留意劍擊呢項運動，身邊其實都有人有劍擊訓練，而我嘅學生 Chris 係其中一位。早係 Chris 中四嘅時候我已經邀請過佢訪問，當時佢話覺得自己無咩特別，事隔一年，經過幾次比賽奪得第一名，Chris 已經成為香港少年組男子花劍第一名嘅運動員，今次邀請 Chris 同我地分享佢同劍擊嘅故事。

｜關於劍擊

唔知大家係今次奧運之前對劍擊比賽有無認識呢？劍擊分為花劍、佩劍同埋重劍項目。花劍規矩比較複雜，攻擊嘅目標係對手嘅軀幹；佩劍係一比一嘅比賽，主要攻擊對手上半身；重劍如佢個名，所運用嘅劍比較重，亦以攻擊對手上半身為目標。

*註：想了解更多可以參考網上資料

Chris 分享劍擊比賽有運用科技幫助計分，所以非常精準。劍擊比賽講究運動員體力同腦力，因為每個人係場上運用嘅策略都唔同。作為花劍運動員嘅 Chris 分享「花劍規矩比較複雜，但亦比較有趣，因為我地仲要計埋進攻權，所以容易有爭拗。」

｜遇上劍擊

當我以為劍擊係中小學界唔算普及嘅時候，原來Chris 小學就已經接觸劍擊。Chris 小一嘅時候母校有運動示範，佢覺得好型同好得意，就心動想試下。對初學嘅小學生嚟講，要拎住咁重嘅劍，仲要記好多規矩，一啲都唔簡單。Chris 覺得以前主要玩下開心下，而家就聚焦備戰比賽，希望係整體排名同成績都有提升。「而家消閒嘅感覺少咗，但我希望係比賽同興趣取到個平衡」。

Chris 由小學開始玩，中途都有遇過瓶頸，就係中一二嘅時候，當時因為未發育，身高比起好多對手都唔夠高，肌肉量又唔夠，參加好多比賽都輸，但Chris 同自己講要捱，相信自己發育後就會好啲，佢最後都成功衝破瓶頸繼續練習。

｜為劍擊嘅付出

相信做到香港少年組男子花劍第一名必定要付出好多，問 Chris 點樣達到而家嘅成績，佢謙虛話都係不斷嘅練習。「係香港玩劍擊又堅持落去嘅人唔多，仲要呢項運動係香港咁唔普及，好多人中途都放棄咗」。Chris 有時會覺得呢項運動唔普及，即使自己努力咗都無咩人會知，或者無人留意呢項運動嘅比賽同獎項，但係Chris 堅持不斷練習，體能訓練外，仲要練習步法同埋分析策略。

身為高中生嘅 Chris 既要返學，又要兼顧劍擊練習，佢點樣分配時間呢？Chris 一星期有幾日都要去香港體育學院練習，練習到晚上 10 點，然後再返屋企處理學業，Chris 表示佢會好好運用週末嘅時間去應付學業嘅要求。

｜目標與期望

5 分係最普及的話，Chris 認為劍擊係香港嘅普及程度只有 2-3 分，不過奧運得到第一金後多咗香港人留意呢項賽事。Chris 覺得場地嘅缺乏係呢個運動唔普及其中一個原因。Chris 最希望政府可以俾多啲注意俾劍擊運動員，例如係俾多啲資助劍擊總會，或者係為香港隊聘請更多教練。

見到 Chris 滔滔不斷咁分享關於劍擊嘅生活，問佢會唔會想做全職運動員，Chris 就話覺得未必，因為要做一個全職運動員去維持生計唔容易。Chris 目前希望有機會參與多啲世界賽，希望透過不同經驗，見識唔同國家選手嘅步法，希望技術同能力可以再進一步。

｜劍擊帶來嘅轉變

Chris 覺得劍擊有改變佢嘅性格。Chris 細個嘅時候比較害羞，而家變得大膽咗。除咗性格，劍擊最重要當然係令 Chris 嘅 EQ 進步咗好多。臨場發揮外，有時候其他人對於自己排名嘅討論都可能會影響 Chris 嘅情緒，呢啲都係 Chris 需要學習去面對。

「劍擊好講究體力同腦力，我地要諗唔同策略，仲要控制自己比賽時嘅情緒同 EQ，你越係驚就越係輸」。Chris 覺得體力係可以訓練的，至於情緒真係要好好控制，因為比賽中有機會落後對手，領先對手又唔可以太輕敵，再加埋環境因素例如係裁判同埋觀眾反應都會影響。

後記：作為 Chris 嘅老師，見到佢嘅成就除咗覺得驕傲外，當然都會擔心佢係咪兼顧到繁忙嘅學業，同埋有無足夠休息。不過見 Chris 嘅自律，同埋努力做好時間管理，相信身邊人都會放心。希望 Chris 繼續係劍擊成就更上一層樓，為港爭光。