前言：相信好多讀者以前去旅行嘅時候都會將「學煮餸」加入行程，而煮泰菜應該係好多人都試過嘅體驗。疫情影響咗去旅行，有無諗過係香港都可以煮到地道泰國菜？今次為大家介紹位於坪洲 Siyamon Thai Cooking School 創辦人Jenny 嘅故事。
｜係香港成長嘅泰國人
Jenny 可以講到流利嘅廣定話，問佢係咪特別去學，佢分享全靠同屋企人嘅日常對答學返嚟。Jenny 嘅姑媽一直都係香港，姑媽認為香港嘅工作環境同人工比泰國好，所以就叫 Jenny 去香港。19 歲嘅 Jenny 於是就過嚟香港讀書同做嘢。
「我姑媽每日對住我講泰文，逼我要用廣東話回答，所以我嘅廣定話學得好快」。
｜從國際學校到廚藝學校
Jenny 係香港做過好多工作，除咗係餐廳打工外，開廚藝學校之前佢仲係 ESF 國際學校做 Food Tech Technician 教中學生烹飪。
Jenny 其實一直都有係香港開廚藝學校嘅想法，奈何香港嘅租金實在係太貴，直至係坪洲見到租金較相宜，離島嘅氣氛又輕鬆啲，所以決定係坪洲開學校。
「好多人或者都識煮嘢食，但唔係全部人都識教人點煮或者解釋啲步驟。我係 ESF 見到好多鍾意煮嘢食嘅小朋友，然後我又識得解釋，所以就決心擁有自己嘅廚藝學校」。
問 Jenny 之前教過嘅小學生多唔多「港孩」，佢就話好多係香港嘅小朋友其實都唔需要做家務，基本上好多家庭都有工人，但另一邊廂有好多小朋友其實煮嘢食好叻。
｜香港煮地道泰菜
Jenny 深明呢到唔係一般廚藝學校，到訪嘅人係想輕鬆煮餸多啲。「大概 20% 到訪嘅人係完全對入廚無認識，係連基本材料都認唔出的」，不過不論點樣嘅程度 Jenny 都會一步一步成功教到你煮似模似樣嘅泰菜。
Jenny 分享好多人煮完一次都會再去學煮其他菜式。「我有一班學生係每個月來一次，佢地一班朋友包班，大家一齊煮一齊玩」。
係香港煮泰菜用咩材料呢？好多醃料都係泰國直送，有啲食材就係用香港新鮮嘅，連用具好多都係泰國傳統器材，務求令到訪嘅體驗更有泰國味。
｜屬於自己嘅廚藝學校
擁有自己嘅學校 Jenny 當然開心，但都唔係咁容易的。遇上新冠肺炎，同其他店舖一樣都大受影響。學校曾經要關閉三次，因為都怕太多陌生人到訪學校。營運初期Jenny 仲有恆常班教授指定菜式，而家就只接受私人包班。
Jenny 表示呢兩年因為疫情香港人無得去旅行，好多人都掛住煮泰菜嘅體驗而去搵 Jenny 煮返幾味。
Jenny 分享同好多客人都有保持聯絡，「有啲客人試過一次後係屋企再煮然後會影俾我睇㗎」，另外有客人見到 Jenny 嘅食譜用緊全英文主動幫佢翻譯做中文版本俾其他客人。
Jenny 對於有自己嘅廚藝學校有好大滿足感，因為見到大家都成功煮到泰國菜。佢覺得自己識講廣東話幫助好大，因為就算部份香港人唔識英文，嚟到佢地都溝通到。
｜Jenny 的願景
問 Jenny 有無計劃返泰國，佢都話有諗過的，佢最想就係返泰國營運一個係有齊農場，廚藝學校同住宿一條龍嘅地方。Jenny 話會努力想呢個目標進發。
後記：我曾經係幾年前去過清邁學煮泰菜，個次體驗好好。訪問當日第二次煮，雖然係香港，但一樣咁好玩。係 Jenny 指導下，亦成功煮到幾樣傳統泰國菜式。暫時無得飛，心癢癢掛住泰國嘅讀者不妨去坪洲跟 Jenny 煮下嘢食。
想了解更多可以 WhatsApp 6709 3878 查詢上堂資訊或者 add Instagram @siyamon_thaicooking 。
有故事的人 Story Teller | Kenry Lee 