#99 麗子 | 紋身師

前言：麗子係我荃灣嘅舊生，因為有故事的人緣故再同佢聯絡返，前排知道佢一直想鑽研關於紋身呢個手藝，疫情期間更加飛到韓國學師，今次邀請佢同大家打破對紋身嘅刻板印象。

｜紋身的普及程度

我認識嘅麗子外表非常斯文，或者同大家想像中嘅紋身師形象有啲唔同。麗子認為係有啲人對紋身有負面嘅刻板印象，「有啲人比較守舊，或者係因為啲人唔認識紋身係咩嘅一回事所以令呢件事唔普及」。麗子坦言媽咪一開始都會擔心，例如媽咪會擔心麗子將來係咪可以用呢門手藝搵食，又會擔心紋身嘅圈子會唔會啲人好惡，不過麗子話媽咪對於佢去學藝都係傾向支持，甚至佢籌辦 studio 媽咪都幫咗佢好多。

麗子覺得紋身係香港嘅普及程度係 3.8 分（笑），其實唔算好差，但佢認為當同外國比較就唔算好普及。麗子分享其中一樣同地理有關嘅觀察，就係外國我地會見到紋身店有地舖，但係香港我地比較少會見到。麗子補充有啲地方如果知道係用嚟做紋身生意的話甚至會唔租。從呢個例子都會感受到紋身係香港係有啲負面聯繫。

｜紋身令藝術創作更進一步

印象中認識嘅麗子同紋身毫無關係，但原來麗子高中嘅時候已經有所想法。「中學嘅時候修讀視覺藝術多數都係畫紙上創作，SBA 雖然有創作空間，但都係要整一啲令我地容易高分嘅作品，所以都係有啲限制，唔夠隨心所欲」。麗子後來係大學雖然無修讀藝術，但仍然閒時會自己畫畫，亦會嘗試唔同創作媒介。麗子 Year 2 嘅時候偶然係 Instagram 見到韓國嘅紋身作品，驚訝可以將藝術作品放係皮膚上，亦係呢個時候開始留意紋身嘅創作，以去韓國學藝為目標。

雖然訂立咗呢個目標，麗子知道未有咁快去到，所以繼續係香港創作，亦開始學韓文裝備自己。麗子 Year 4 嘅時候開始搵下香港嘅紋身 studio 學藝，最後係 2021 年用半年時間係韓國深造。

｜身邊的支持聲音

就住一般人可能對紋身有負面聯想，我問麗子身邊人有咩反應，好好彩身邊人都好支持佢。「我最初同家姐分享個陣佢已經好支持我，到 2019 我第一次同呀媽講關於想深造紋身，佢都好支持我」。麗子笑言媽咪只係有一個要求，就係可以幫人紋身但自己唔可以紋身，雖然後來麗子有請一位朋友幫佢紋身，好在媽咪都無惱。媽咪之後仲成日準備豬皮俾麗子等佢可以練習，亦係籌備 studio 嘅時候幫咗好多。「其實當我話要去研究紋身嘅時候，身邊好友都有啲驚訝，不過佢地仍然好支持我」，可見過程中身邊人都好支持麗子。

｜紋身的意義

麗子覺得紋身對佢嘅意義有兩層。作爲一個紋身師，佢希望大家見到佢嘅作品會有療癒嘅感覺，期望透過可愛嘅圖案可以幫忙減壓。有時係可愛動物，有時係超現實嘅設計，麗子希望望到嘅人都可以暫時脫離現實。

麗子覺得好多時紋身都係有一個人生經歷或者有嘢想提點自己，所以當麗子幫其他人紋身就好似幫佢地完成左個心願咁，幫助客人放低一啲執念，繼續向前行。

｜到韓國深造 Micro-realism 風格紋身

係眾多紋身風格，麗子最鍾意 Micro-realism，顧名思義係一種小型寫實風紋身，世界各地例如美國同台灣都有人鑽研呢個風格，但韓國係比較多出色嘅 Micro-realism 紋身師。

麗子覺得韓國嘅紋身師出色之餘亦樂意同身邊人分享。麗子係學習過程中不斷問問題，佢嘅老師就耐心回答，樂於分享自己嘅知識。訪問當日我先知道原來紋身係韓國係唔合法的，但有趣嘅位就係好多韓國藝人都有紋身，但法律訂明被紋身一方無犯法，只有紋身師傅犯法，麗子話韓國好多紋身師積極爭取緊廢除呢條法例。

係疫情期間飛去韓國，問麗子有無咩特別體驗，佢話佢總共隔離咗 28 日，為咗去深造付出真係唔少。麗子曾經有諗過等疫情完結先過去，但見到疫情好似沒完沒了，佢就決定過去，佢同自己講 “If not now, when”? 麗子話疫情緣故雖然無咁多機會係韓國玩，但就多咗時間專注練習紋身。

｜希望透過作品 “heal your soul”

麗子最希望所有人見到佢嘅作品都有種療癒感 “heal your soul”，「我希望其他人見到我嘅畫會覺得舒壓，而紋身就提供咗一個機會去實行呢個理念」。麗子希望除咗香港人外，佢可以將呢種感覺帶俾世界唔同地方嘅人，所以麗子有計劃稍後再去加拿大進修，希望可以學習更多。麗子分享外國電視台有紋身比賽，俾紋身師傅有唔同嘅舞台。

後記：聽完麗子嘅分享，覺得佢好有計劃，亦好有自己想法，呢啲都係以前做科任老師接觸唔到嘅層面，期望麗子可以保持住呢份熱情，亦要對自己嘅作品有信心，希望佢嘅作品會有多啲人認識同認同，加油。

想了解多啲麗子嘅作品可以 search and like Instagram @ gumu.ink。

P.S. 在此特別多謝麗子當年向朋友介紹，我先有機會被東方日報<港故>訪問