前言：不知不覺，有故事的人呢個 page 已經營運咗四年，由一開始主力分享旅遊經歷同訪問外國故事，到而家主力分享香港故事同見聞。由第 1 個訪問到而家第 100 個，決定去回顧下呢幾年嘅變化。
｜Timing 的重要性
好多時同身邊人講起，都會慶幸自己係啱嘅時機離開咗。返嚟香港一陣之後，先係社會運動，繼而再爆發疫情，我成日都會同朋友講笑咁話「而家我上太空都唔會有人有心情理我」。謝謝係一切混亂發生之前我順利完成咗個 gap year，亦令我明白有時有啲嘢真係唔等得。
｜加強版 Kenry Sir
回歸後嘅 Kenry Sir 究竟有無唔同到呢？可能要 before and after 都體驗過嘅同學仔先有答案。我幾鍾意而家課堂嘅自己，比以前更多故事可以分享，尤其係疫情大家都無得去旅行，又無得去考察，我可以用多啲相同片去等大家學好地理。我仍然堅持考好公開試同發展學科興趣係無衝突的。
｜有故事的人
回歸校園之前訪問咗五十個人，有本地有外國故事，重回校園後出故事嘅頻率少咗，但仍然有堅持去搵故事。幾位朋友都會話我返工咁忙都仲可以繼續 update 個 page，無他，因為我真係享受做呢件事。每次嘅訪問我都學到好多嘢同令我見識多咗。我尤其鍾意聽我嘅學生同舊生分享，以前我教地理，而家佢地教返我其他方面嘅知識。我都曾經有諗過好唔好做到第 100 個故事就停，不過呢刻嘅我仲想繼續發掘更多故事 
｜香港的變化
開始呢個 page 之後可以話係見證住香港嘅變化。呢幾年見到部份有故事的人離開咗香港，見到部份有故事的人係自己嘅領域越來越出色，部份為自己嘅夢想或者自己鍾意嘅事繼續默默努力，有時見到有咁多人一齊奮鬥緊或者佢地達到嘅成就都會好開心。不論係離開咗定係留下來的人，希望大家都安好。
｜100 後的展望
有時學生們會問我：你仲會想出去嗎？答案係:會！無時無刻我都覺得自己仍然好想出去個世界睇多啲同認識更深。有時我都會係到諗，其實人係咪一定要係一個定點生活？點解唔可以係唔同嘅地方體驗生活？係因為大部分人都係咁所以俾我地一個咁樣嘅感覺？
100 後嘅展望我最希望當然係快啲可以去旅行。早係半年前已經係網上見到其他國家嘅人開始旅遊，見到其實感覺好差，因為當其他國家嘅人開始恢復正常生活，香港好似仍然都係停滯不前，好似只有香港人嘅時間被凍結咗。希望疫情可以快啲好起來，然後大家可以恢復去旅行嘅時光。
後記：謝謝睇到最後嘅你，我唔期望每位讀者所有故事都追曬，但願我訪問嘅唔同人都有一部分令你搵到共鳴，令你有所反思，令你知道身邊其實有好多有故事的人。希望你都搵到屬於自己嘅故事。
To be continued…
重溫 To read
#1-50 有故事的人訪問
#1-50 interviews of story tellers
有故事的人 Story Teller | Kenry Lee 