前言：成日都話一個社會有幾文明可以從如何對待動物得知。社會上嘅動物唔係全部都咁好彩有人照顧或有人錫，流浪貓狗天生天養，可能死嘅時候死於非命，亦無人送別。好在香港有浪浪送行者，默默地為為呢班浪浪生命嘅最後一刻付出。
｜浪浪送行者的創立
Kazel 同部份義工，包括創辦人呀峰先係另一個動物組織做義工並認識，但後來因為同前組織理念唔相同所以決定離開。有心嘅呀峰仍然想繼續為流浪貓狗出一分力，所以就創立咗浪浪送行者。創立一年幾，義工數目由 22 人增到而家大約 114人。Kazel 話佢地一直都想多啲義工，而想成為佢地嘅義工最基本係要有車或電單車，因為好多營救嘅地方步行未必去到。
｜有心義工 24 小時候命
浪浪送行者全部人都係義工，大家都有正職嘅情況下究竟呢個組織係點運作呢？三位負責人收到電話之後，會先詢問發現流浪貓狗嘅地區，以及該位置係咪安全，因為有時候浪浪會出現係高速公路，然後佢地三位會再係群組問邊位義工可以去接走浪浪。
義工們去到現場，會先確認幾項資料，例如係動物性別、死亡原因同有無植入晶片。完成後會幫浪浪進行簡單清潔同消毒，放佢地入袋，再送去善終公司。Kazel 特別提到，義工盡量係入袋之前將浪浪屍體還原同埋盡量令佢地火化前嘅樣子比較好，因為冷藏過後基本上無得再調整。浪浪送行者通常會集合埋幾個屍體先去善終中心火化，除咗集體火化價錢平啲，而且浪浪好多時生前都係獨來獨往，希望佢地走嘅時候「有個伴」。
浪浪送行者提倡 24 小時出隊，鼓勵市民唔好怕打擾，我問 Kazel 其實凌晨多唔多人打電話，佢話「其實半夜都多的，例如尋晚凌晨一點有一次，另外四點同六點都有個案。因為貓係夜行動物，加上凌晨馬路車嘅數量比較少，有啲司機可能會開得快啲，所以有時凌晨我地都要出隊」。Kazel 話有三個電話嘅原因就係因為怕一個人瞓咗聽唔到，都有其他人補上。至於日間，大家都有正職，但部份義工工作性質同時間比較彈性，所以都會搵到人接走浪浪。
流浪動物個案係咪郊區會多啲呢？Kazel 分享其中兩個黑點係錦田同粉嶺，因為個邊好多貨倉同車場都有流浪狗。至於市區，就以貓由高處墮下嘅案例為主。
｜動物非工具
Kazel 指出佢地收到電話後，不論個案有無主人佢地都會立刻過去現場。「試過有一次係鋪頭貓，係鋪頭門外被車死，個老闆見到，但只係冷冷話係細個隻，完全無覺得傷心或者想做啲咩，見到呢啲情況真係覺得好心痛，點解可以只係當貓狗係工具用途，好似無感情咁」。Kazel 話有啲主人選擇唔認返意外出事嘅寵物其中兩個原因係怕被人公審或者怕要負擔好昂貴嘅醫療費用。
｜希望浪浪走得有尊嚴
當我以為組織拯救嘅都係已經過身嘅浪浪，Kazel 分享更令人揪心嘅係有時候遇上奄奄一息，作垂死掙扎嘅浪浪。「有時遇到呢啲情況更令我地無助，但有時候呢啲情況去到獸醫都會建議打針俾佢地走，因為好多情況其實康復都好有困難，或者根本失去自理能力，但我地都盡力都幫助每一隻浪浪」。Kazel 回憶第一次出隊，火化浪浪後自己喊到收唔到聲，佢話而家好多新義工都會咁，「而家我嘅心態調整咗，唔係太多個案麻木咗，而係我知道自己係幫緊浪浪，所以無咁傷心」。
唔知大家有無諗過如果流浪貓狗如果無人帶走結果會點呢？部份可能就地腐爛，有啲就俾清潔工人當做垃圾掃走掉去堆填區⋯「我地唔想浪浪去到最後一刻仲要俾人當垃圾，我地希望佢地可以走得有尊嚴」。的確，組織帶走嘅浪浪非常盡力將佢地身軀回復原狀，因為有時貓狗可能被車輾過，身邊會變形，佢地甚至會為身體縫紉修補，有毛巾圍住，亦有寵物零食陪同火化，希望最後一刻「有人錫」。
好多愛貓愛狗之人都對浪浪送行者嘅工作表示支持同認同，但呢班義工付出嘅同時都係有負面聲音。「有試過有人話我地無聊，覺得流浪貓狗死咗未算，或者係有時候真係有需要係高速公路拯救嘅時候話我地阻住條路等等，做咩都係總有啲鍵盤戰士留言話你嘅」。
｜寄語：盼望大眾尊重每個生命
訪問結尾問 Kazel 有咩訊息想分享，佢回答「希望大家都尊重生命，我地大家都身處係同一個星球，唔應該分高低。希望大家都可以善待動物，大家彼此尊重」。
Kazel 認為浪浪送行者嘅工作係一個好好嘅生命教育，因為平時市民未必有機會接觸流浪動物，過程中可以令人更有同理心。Kazel 話有義工甚至出隊嘅時候會帶埋小朋友同行體驗。
我曾經有朋友講過話驚見到呢類型嘅帖文或者怕見到往生浪浪，Kazel 就覺得如果係有需要嘅時候市民因為怕傷心而視而不見，甚至行開，其實都係一種傷害，因為明明有機會可以做得更好。
浪浪送行者主張不收捐款，只希望佢地有需要嘅時候大家捐助物資。「有涉及錢成件事就複雜，甚至可能有人會覺得俾左錢我地係一個服務」，Kazel 覺得大家有心想幫助的話，除咗加入佢地外，分享佢地嘅資訊俾其他人認識都好重要，因為可以俾更多浪浪受惠。
後記：由一開始訪問嘅貓義工同獸醫助理，到前陣子訪問嘅 SAA 保護遺棄動物協會，到今次嘅浪浪送行者，不知不覺已經訪問過幾個同動物相關嘅故事，大家都係唔同崗位為動物或流浪動物付出，希望你我牠係同一片土地上都能和平快樂共存。
P.S. 前排「暑假」行山時曾經遇過一隻懷疑被車撞嘅貓貓，當時我就即刻諗起係 Facebook like 過浪浪送行者，於是即刻打電話通知佢地，最後隻浪浪亦順利被帶走並火化。謝謝浪浪送行者無私嘅奉獻。
如讀者想了解更多，可以 search and like Facebook “浪浪送行者”或重溫 Viu TV 《勁騎 26》第六集：浪浪送行者。
Search and like Instagram @ storyteller_kenry
有故事的人 Story Teller | Kenry Lee 