前言：唔知大家有無留意近年好多人都會提及 mindfulness 或者靜觀等嘅用詞？其實呢兩個概念係咩嚟，對於我地日常生活又可以有咩幫助？今次訪問正念餅乾 Mindful Biscuit幾位導師，會透過佢地嘅故事將呢啲概念深入淺出俾各位讀者認識。
｜Mindfull Vs Mindful
訪問一開始問幾位何謂正念，導師們話將念字拆開，係一個今同一個心字，究竟今天你的心如何呢？大家有無留意當下，正在發生嘅事？
我地好多時腦海都會胡思亂想 (mindfull)，但大家有無留意自己嘅身體同心嘅反應呢(mindful)？近年疫情肆虐，好多人都處於恐慌嘅狀態，甚至令心理健康出問題。
正念講求覺知 awareness，大家有無花時間覺察當刻自己嘅行為同情緒，定係後知後覺甚至係不知不覺？有啲人比較衝動，可能思考得唔夠耐就已經行動，最後可能後悔。幾位覺得例如係以上兩個情況，如果大家對自己嘅情緒同感覺留意多啲，可以避免好多問題。
｜正念非神奇靈藥，非帶有宗教色彩
我覺得今次訪問都有令我更了解何謂正念，因為唔了解而存在不同謬誤。
首先，好多人都覺得正念同宗教有關，但正念主要讓人更察覺自己嘅感覺同情緒嘅方法，並無參雜任何宗教儀式或行為。正念希望人可以更留意當下，係一個心態上嘅轉念。有啲人會覺得係咪要做某啲嘢先可以做到正念，但其實唔係要特別去做某樣行為。外國有好多研究，透過大腦掃描見到運用正念後對人腦嘅轉變。
正念並唔係一聽完，生活即刻順遂，咩煩惱都無曬。正念需要練習，透過唔同狀況去認識了解自己更多。當人遇到唔開心，正念鼓勵大家先接受狀況，當情緒開始消退嘅時候再面對問題，將自己由壞情緒拉返嚟。例如當你遇到一件事令你好苦惱，無接觸正念嘅人會選擇即刻發脾氣，有接觸嘅人會察覺到呢個情緒，但會俾時間自己諗下點樣去處理件事。或者遇到唔開心嘅事時，你會更有意識留意自己有無墮入思想陷阱，從而幫自己走出困境。
｜從不如意學習 每次變得更好
幾位導師都有分享係人生唔如意嘅事令佢地想學習正念。
「我想尋找永恆的快樂」，「我想搵一份平靜」聽落去好似係好虛無嘅追求，係我面前可以好平淡分享嘅導師們，其實各自都經歷過人生唔同唔如意嘅事：同家人嘅衝突，失戀，甚至係情緒病的困擾⋯係唔同嘅緣分下，佢地都有機會接觸到正念，令佢地慢慢練習，接納自己嘅情緒，再慢慢處理唔同嘅難題。
正念唔係一次就改變咗佢地嘅人生，反而導師們覺得正念係一個學習過程。每次遇到唔如意嘅事，一步一步做好，每次都比上次更有意識留意自己嘅情緒，從而做正確嘅決定或行為。
四位導師，三位係義工形式幫手教正念餅乾嘅課程，佢地都因為正念對佢地人生嘅改變，所以想將呢個自助嘅工具分享俾更多人認識。
｜關於快樂
作為正念餅乾唯一一位全職導師，Katie 結語覺得快樂嘅方法有好多種。佢覺得正念幫助到幾位導師，而呢種正面嘅能量係可以散播俾其他人，令整個世界都更美好。「有時我地控制唔到外在會發生嘅事，但我地可以控制自己用咩心態面對」。
關於「正念餅乾」:
「正念餅乾」成立於2017年，致力研究及推廣「正念」。以自家研究為基礎，定期開辦不同類型的「正念」課程，包括一日正念課、正念初體驗（如禪繞畫、正念飲食等）、小學、中學及成人課程、學習放鬆、安定的方法，重新認識自己，發掘生命不一樣的可能性。
後記：事前唔認識正念嘅我，大家睇完今次個故事，可能同我做訪問嘅時候一樣、有好多疑問，覺得係咪咁「神奇」。經過追問後，我覺得我對呢個工具有更深入嘅認識，而各位讀者可能要親身試下，先知道呢個工具適唔適合自己。有興趣認識更多嘅讀者，可以 search and like Instagram @mindful.biscuit 或者閱讀由正念餅乾出版嘅《正念的新理論框架：餅乾模型 Biscuit Model》。
有故事的人 Story Teller | Kenry Lee 