前言：南丫島可能好多香港都有去過，但係島上生活又係點嘅呢？今次有緣遇到好愛香港嘅南丫島島民 Sam 同我地分享佢嘅故事。
｜與南丫島結緣
香港人生活節奏快，大多係假期先會去南丫島放鬆下，點解 Sam 會選擇係南丫島住呢？
「其實我同我老公都無諗過搬入南丫島的，真係緣分」。13 年前嘅一日，Sam 同老公去南丫島玩，經過地產舖見到南丫島啲單位又大又平，於是決定去睇樓。佢地去睇嘅第一間屋已經十分鍾意，於是決定搬入南丫島！
「搬入南丫島嘅人通常分兩種，一係好鍾意，一係唔習慣住夠一年就走」，而 Sam 同老公當然係屬於前者。問 Sam 有無需要適應好長嘅時間，佢覺得一開始要適應係船期，因為二十五分鐘先有一班船，不過一陣之後佢地都適應咗。「我覺得係心態問題，如果想追求多姿多彩嘅生活就未必會選擇南丫島」。
Sam 覺得南丫島嘅生活就好似以前係屋村嘅生活咁，同鄰居關係密切。「南丫島嘅居民好有人情味，試夠有一次去餐廳食飯唔記得帶銀包，老闆話聽日先啦，其實我無同老闆講過我係到住，但原來老闆默默地已經認得我」。Sam 憶述有颱風天返唔到屋企，全靠鄰居幫手閂好門窗。雖然偶爾唔方便，Sam 嘅鼻敏感好返，佢亦覺得島上嘅生活先係真正休息，所以值得。
｜南丫島的團結力量
Sam 住咗係南丫島咁耐，佢覺得南丫島嘅島民好團結。「你地有無留意南丫島係唯一一個主要離島無大集團生意的」，兒時嘅謎底終於解開，當長洲同梅窩有麥當勞同惠康、坪洲又有惠康嘅時候，南丫島只係得士多同雜貨店原來有原因的。「其實唔係無人想租，不過島民知道如果租咗一間，其他小生意都會捱唔住」。島民可能係為咗自己後代嘅利益，但起碼大家都無因為自己可以賺得多啲而租舖俾大集團。
Sam 補充島上嘅人，2019 社會事件後其實都有不同政見，不過島上民居仍然都係和諧共處的，唔會話面阻阻。
｜《59.日系》— 一點寄託
「社會事件個陣成個大環境氣氛都好差，每日接受住唔同資訊，原來自己鬱出病都唔知。自己都想 take 個 break，剛好呀仔係日本讀書可以幫手入貨，所以決定開舖！」
以為 Sam 係因為好鍾意日本，因為疫情去唔到旅行所以代購用日本貨品為主題，但 Sam 分享主要係鍾意日本貨品嘅簡單/簡約，而佢開舖賣嘢嘅又唔想同島上其他舖頭一樣，所以就決定賣日本貨品。
訪問當日我係俾《59.日系》嘅木色裝修吸引咗，一入門口已經見到唔同種類嘅日本零食，舖頭右邊擺放住唔同人寄賣嘅貨品。Sam 話係架上面嘅貨品都係產自南丫島或者係南丫島島民出品，希望呢個空間可以互相幫下南丫島島民。
｜越著緊 越心痛
經歷社會事件，Sam 表示多咗遊客詢問點樣可以係島上居住，島上同路人得閒就會去《59.日系》搵 Sam 傾計。佢話呢幾年好多島民，不論係本地人定外國人都離開咗香港。同老公計劃緊移民嘅 Sam 就覺得，一日未走之前，佢都希望《59.日系》可以做到同路人嘅樹洞，有個地方俾佢地傾訴自己嘅心事。
從 Sam 嘅對話會知道佢係好愛香港嘅居民。佢地真係移民的話，佢地希望南丫島呢個地方唔會變，尤其係島上嘅人情味。
後記：
「你越看得開，心越自由」係今次訪問 Sam 分享的其中一句。訪問過程中都有反思自己究竟想過點樣嘅生活。讀者有時間其實都可以諗下自己嘅理想生活係點。
希望 Sam 同屋企人生活愉快。想了解多啲 Sam 以前去旅行嘅經歷同南丫島島民生活嘅讀者可以 search and like Instagram @59.travel_share
有故事的人 Story Teller | Kenry Lee 