前言：有行開山嘅讀者有無留意有時候係郊野公園或者難行嘅山徑都係好 well-paved? 有時候我都會諗究竟啲人係點樣搬啲材料上去，大家有有無諗過呢啲山徑係點出現嘅呢？今次請綠惜地球嘅 Anita 幫我地解答！
｜綠惜地球嘅成立
係做呢個訪問之前，其實我並唔認識綠惜地球呢個 NGO，係學生 Instagram 見到先貿然發出訪問邀請。綠惜地球係 2016 年成立，Anita 話呢個組織雖然成立唔算好耐，但核心成員全部都係環保界別廣為人知。其中一個成員 Vivien 係跑山愛好者，佢跑山嘅過程發現郊野公園好多垃圾，另外好多跑步比賽其實好唔環保，仲製造好多垃圾，例如係號碼布同佈置等等，就係咁開始關注郊野公園嘅情況，亦同志同道合嘅人開始咗可持續山徑呢個項目。
｜行山人士造成的破壞
疫情期間香港好多人都去行山，好多出名山徑例如係玉桂山或者元朗大棠其實「好爛」，Anita 指出水土流失太嚴重的話其實對行山人士都會構成危險，因為一失足就會發生意外。有啲人甚至熱愛「爆林」，即使政府已經劃出明確行山徑，部份人士可能貪方便或者想探險所以就肆意破壞樹林，為嘅可能只係快一個彎位，Anita 對於呢啲種種行為表示擔心。
Anita 指出近年有啲行山人士「爆林」之餘，仲要拍片教大家點行，其實咁樣令其他人有樣學樣，對大自然好大破壞，仲可能令不必要嘅樹木倒塌。同埋香港要維護山徑有困難係因為香港有好多地方都好容易去到，所以破壞會加劇。
｜維護山徑義工工作
綠惜地球係每個項目招募義工，而今次我想了解多啲嘅山徑維護項目係由 2019 開始。Vivien 留意到某啲受歡迎嘅山徑因為俾人不斷踐踏，水土流失好嚴重，所以組織開始想做多啲維護工作，佢地可算係山徑保育嘅先驅。綠惜香港同漁護署合作，同佢地溝通過後先開始進行佢地嘅項目。Anita 分享好多義工其實都係行山愛好者。「佢地都想出一分力，回饋返俾大自然」。Anita 觀察到咁樣嘅義工工作令佢地有深度嘅參與，除咗學習之外，同大自然嘅聯繫更緊密。
*註: 郊野公園屬於官地，無官方允許私人名義係唔可以進行任何工程的
義工工作包括理論課，考察同埋實踐部份。組織會先請山徑維修師傅(農林技工)分享佢地係點樣製作手作步道，義工們學習到個技術同藝術之後就幫忙搬運木材或石材上山，再進行維修。有啲義工服務係兩日一夜要係山過夜添！ Anita 認為義工了解到過程有幾艱辛之後會更珍惜大自然。
2020 疫情嚴重個陣，好多香港人都選擇行山，對於環境破壞更大，組織開始用航拍機紀錄行山人士對唔同山徑嘅破壞，例如係雞公嶺。
問 Anita 覺得香港人對於山徑維護嘅工作關注度如何，佢覺得一路有推進的。「由一開始可能只係表面嘅認識，而家義工們會考慮得更仔細，例如山徑位置係咪足夠位置擺放石頭，或者點樣擺啲石頭無咁容易被沖走等等，大家開始對呢門手藝有更多認識」。Anita 希望縱然各國開始開關，大家仍然會關注呢個議題。
｜山徑維護嘅樂趣與挑戰
Anita 覺得義工們參與維護工作之後除咗同大自然有更深聯繫外，仲會對大自然有更大歸屬感。而且 Anita 樂見唔同背景唔同工作嘅人一齊為大自然努力，見到人與人之間嘅聯繫。Anita 分享曾經聽過台灣義工分享，當地人覺得除咗係人與人，人同大自然嘅聯繫，仲係唔同時空嘅聯繫，例如當地人會研究以前點解啲人要咁樣鋪步道，台灣人仲會將步道設計考慮埋不同原居民部落特色。
至於挑戰，Anita 覺得呢個始終係勞動工作，體力真係一大挑戰，例如有時候要幾個人一齊搬一塊大石。Anita 亦分享唔同人對於呢個議題有唔同見解，例如有啲人覺得用木材好啲，有部分人認為石屎唔適合用作步道原材料等等⋯
｜盼望不同持份者為維護山徑努力
問 Anita 綠惜香港嘅願景係咩，佢話係要建立可持續山徑，由設計，建設，到維修需要做到。機構希望行山人士，政府部門同大眾市民都可以多溝通同對可持續山徑呢個議題有多啲認識。
後記：同 Anita 傾計過程其實好多位我都有共鳴，因為適逢疫情我開始接觸航拍，不只一次影到水土流失非常嚴重嘅山徑。我地身處香港其實好多嘢都好幸福，可能有時候會太理所當然，今次希望透過呢個訪問令讀者留意多啲山徑嘅保育，就算行山都要做個有公德心嘅行山人士。
有興趣了解更多綠惜地球嘅工作可以 search and like Instagram @greenearthhk，仲可以留意佢地之後嘅山徑保育義工，為大自然一齊出一分力！
是次訪問要謝謝舊生Bosco，因為佢去做義工先解答咗我一直想知道嘅步道維修係點做。
想認識更多嘅讀者：
山野謎の物 第一回 (大棠石籃及截水壩)
山野謎の物 最終回 (彎曲山木梯及截徑修復)
有故事的人 Story Teller | Kenry Lee 