前言：「美少女轉身變」「代替月亮懲罰你」呢兩句歌詞相信好多讀者都會覺得好熟悉，動漫美少女戰士原來已經踏入三十週年，係之前嘅日本旅行特登安排去準備結束嘅美少女戰士博物館，俾我呢個粉絲重溫兒時嘅回憶。係博物館門外膽粗粗邀請兩個外國粉絲Josh 同 Nadia 做訪問，今次同各位八十後一齊回顧下大家對美少女戰士嘅喜愛。
｜童年與美少女戰士結緣
Josh 係菲律賓人，今次已經係佢第二次參觀美少女戰士博物館。Josh 爸爸係大阪出世，作為水手嘅爸爸成日都會有機會去日本，然後成日都會帶日本電視嘅錄影帶 (透露年紀的產物)俾當時仲住係菲律賓嘅 Josh 做手信。Josh 回想以前嘅錄影帶爸爸係錄咗好多節目，由日頭錄到夜晚，但 Josh 最有印象嘅就係美少女戰士。Josh 覺得美少女戰士係 8，90 年代比較有趣嘅動畫，而且係少有嘅女性英雄卡通。佢亦對戰士們變身嘅動畫同音樂印象好深。
Nadia 係印尼人，佢回想細個當美少女戰士第一季開始播放已經係印尼非常受歡迎，佢話美少女戰士嘅普及程度係連炸雞專門店都有佢地嘅宣傳。Nadia 話小學嘅時候好多同學都會交換同賣貼紙。佢認同美少女戰士係好多女孩子嘅夢想，因為戰士們都被刻畫得好型，亦改變咗佢地對女孩子嘅印象。Nadia 話以前總係男性主導嘅卡通例如恐龍戰隊先會配對唔同顏色，但美少女戰士係第一套唔同戰士都有專屬嘅顏色。
｜小朋友與成人視覺
問兩位佢地嘅最喜愛角色係邊個，Josh 話係海王星 Sailor Neptune 同天王星 Sailor Uranus，Josh 話其實美少女戰士係探討 LGBT 議題嘅先鋒，作者對兩位角色嘅關係描寫Josh 大個之後更加明白。
Nadia 都補充細個嘅時候睇呢兩個角色係有啲混淆，覺得作者描寫佢地嘅時候打破咗好多現今社會嘅性別定型。Nadia 覺得大人視覺睇咁多位戰士嘅互動有另一番體會。
Nadia 自己就最鍾意火星 Sailor Mars，原因佢只係講：She is sexy (大概有睇過美少女戰士嘅讀者先會明白 )
｜童年回憶的美好
問兩位點解會鍾意美少女戰士三十年，而家居住係日本嘅Josh 先分享呢件事非常懷舊，好想回顧返童年嘅開心回憶，而事實上到訪嘅人多數係成人。
Nadia 就覺得一直鍾意呢套動漫係因為美少女戰士真係改變咗好多人對男同女嘅睇法，因為以前女性真係比較無咩 attention。
佢地兩位都有提到近年推出嘅新版本 Sailormoon Crystal，但佢地都覺得新嘅畫風一啲都唔自然，因為戰士們嘅外表好似為咗要配合現代對「美」嘅標準，全部都係腳超長超瘦，塊面係異常尖，望落去怪怪的⋯
後記：要係日本做訪問一啲都唔簡單，今次係剛好聽到兩位都講到流利英文即刻邀請佢地傾計。唔知大家又係咩原因鍾意美少女戰士嘅呢?
有故事的人 Story Teller | Kenry Lee 