#108 Gita | 峇里島健身教練

前言：前排到訪峇里島發現當地好多人英文程度比我想像中差，本身已經打消咗係峇里訪問嘅想法，點知係行程嘅最後一間酒店遇到 Gita。今次等佢帶我地更認識峇里。

｜香港同峇里的分別

Gita 2014 年曾經去過香港，主要目的係去旅遊，印象比較深係迪士尼樂園同星光大道。佢覺得香港同新加坡有啲似，都係好多高樓大廈，不過香港更多人。

Gita 覺得兩地嘅文化同生活都幾唔同，香港專注啲係錢同工作，佢覺得峇里島嘅人輕鬆啲。

｜峇里島的文化與傳統

係峇里島街頭到處都可以見到用草造嘅一個正方盤，裡面放住鮮花，蠟燭同少少零食，無知的我初初以為呢啲係拜祭用品，後來發現好多地方都會見到，甚至車上都有，再問先知呢啲係當地人口中的 offerings。為咗得到祝福，亦為答謝神明或祖先的保佑，佢地都會係屋企/店舖外擺放 offerings。

另外，如果你有機會去當地人屋企參觀，你會見到一定有 family temple，當地人好重視同先祖嘅聯繫，會每日上香，如果有大事例如有小朋友出世，或者有囍事，如果係 temple 慶祝。Gita 分享峇里人好重視 connection，同神明的聯繫，人與人之間的聯繫，仲有同環境的聯繫。峇里特別嘅文化與傳統源遠流長，當地人都希望繼續傳承，呢個亦係 Gita 覺得峇里島特別嘅地方。

｜峇里島的旅遊業

問 Gita 可以係大集團酒店工作係當地人眼中係咪一份理想嘅工作，佢分享當地人因為大公司多啲規矩，工作時間比較缺乏彈性，反而唔係個個鍾意。當我以為大集團人工會高啲，Gita 話其實人工同其他當地人差唔多，只係福利會多啲。

Gita 話旅遊業係峇里島係非常重要嘅支柱，所以好多人都係呢個行業，但要入行英文程度要有返咁上下。佢話大部份嘅年輕人應該都符合條件，只係可能有啲住係鄉郊農村嘅人英文程度就可能差少少。

早幾年疫情肆虐，峇里島當然都嚴重受影響。Gita 當時被調去其他部門幫手，可幸嘅係，公司無選擇解僱員工，係呢段時間等唔同員工試下不同部門嘅工作，亦做下維修工作，酒店重心就變咗服務印尼人同峇里當地人。佢話政府係早兩年有鼓勵當地人嘗試創業，希望可以轉型，減少依賴旅遊業。

｜貧與富，門外的世界？

知道峇里島當地人收入比較低，係峇里島幾日，見到當地樓房好多都比較舊，同各大五星級酒店冠冕堂皇嘅裝修形成好大對比，不禁會諗，當地人放工前後會唔會覺得係兩個世界，或者遊客們使錢太離地呢？

Gita 表示佢自己本身都鍾意去唔同地方旅遊，無特別覺得係兩個世界。佢話佢無特別去比較同其他人嘅生活，佢因為自己可以係一間五星級酒店工作而感到感恩。佢亦歡迎遊客到訪峇里島。

Gita 係訪問結束前分享，可能有啲人覺得係市區生活好啲，因為人工高啲，但亦同時要俾高啲租金；相反，係郊區嘅當地人雖然收入無咁高，但可能佢地擁有祖先留俾佢地嘅地，所以無需要特別去比較。

後記：做訪問前一直都覺得好似遊客們會為當地人帶來好大衝擊，但後來反思可能呢個都係我自以為是嘅想法，有種覺得遊客比較優越嘅感覺。今次去峇里島係一個好體驗，期待將來再到訪。