前言：當讀者對於電子打印覺得係理所當然嘅時候，有無諗過以前係要逐個字粒去砌，然後先可以印刷呢? 早前到訪咗台灣現存最後一間鑄字行，除咗有尋下寶搵下字粒，仲同老闆張老闆傾計了解背後嘅故事。
｜超過 50 年老字號
日星鑄字行已經營運咗 53 年，由張老闆爸爸創立，由佢繼承。問張老闆會唔會好多人探訪打卡但無咩人幫襯，出乎我意料之外張老闆話好多到訪嘅人都會幫襯，因爲大部分人都未見過呢樣嘢（包括我），又係其他地方見唔到，所以都會例如搵下自己個名。
唔講唔知，原來私人營運鑄字行係中國內地係犯法的，以前台灣亦有嚴謹監控，係五六十年代嘅時候所有鑄字行嘅負責人每個禮拜都要去警察局報到，睇吓有無可疑嘅人同事，有無人透過鑄字行散播反政府嘅訊息。
｜保育最後的寶藏
張老闆分享 1985 至 1995 係呢個工業嘅黃金期，但呢個時間後快速變差。科技嘅進步，電腦印刷可以話係急速取代呢個工業。台灣嘅鑄字廠亦由最鼎盛嘅超過 20 間得返日星 1 間。
張老闆回憶大概係 2008 年開始有人去日星打卡，原因係平面設計業界有人關注日星係最後一間鑄字行，漸漸有學校開始聯絡日星做參觀同講解，我眼見有好多中學同大學參觀嘅紀念品，張老闆話連幼稚園都有同學參觀，而我到訪當日嘅早上更加有一團香港中學生去過日星。團體參觀者可以體驗執字粒嘅過程，仲可以印刷屬於自己嘅紀念品。
｜尋字遊戲
入到日星，你可以選擇自己尋字，或者搵店員幫忙，我梗係要挑戰下係字海搵下，最後五分鐘就搵到我要嘅五個字。張老闆話其實要尋字唔係真係咁難，日星已經將常用字同偏門字分開，按照字體好容易就會搵到。張老闆話漢字繁體字其實全部都有意思，但近年好多人去算命改名，隨意將需要嘅「元素」加落名到，自創嘅文字就未必係日星搵到。
｜鑄字的禁忌
係日星好多地方都會見到字句「拎起嘅字粒唔可以放低」，當日亦見到有到訪嘅人差啲就咁做，問張老闆點解有呢條規矩，佢話可以話係呢個行業嘅行規。日星嘅員工做咗咁耐，當然熟悉唔同字大概嘅位置係邊，佢地亦無時間逐粒去檢查，所以如果到訪嘅人隨意放返入櫃的話，可能會將啲字整亂曬。
「以前製作報紙我地講求用字的精準度，一個字嘅落差可以差好遠」，例如係關於人命嘅新聞，絕對唔容許出錯，因爲可以引來好大後果，所以拎起咗嘅字唔可以放低。
｜文化的傳承
問張老闆點解仲堅持營運日星，佢毫不猶豫咁答：想保留呢份文化價值。當大部份人注意到係錢嘅價值，張老闆唔想呢個工業同技術係台灣消失。張老闆話爸爸當初由比較郊區嘅地方搬去市區，一路嘅打拼令張老闆對日星好有感情，所以希望一直保留日星，亦可以將自己嘅知識同其他人分享。
張老闆表示要營運日星開支一啲都唔少，既要做機器保養，仲有員工嘅人工，所以家人其實有反對繼續營運的。疫情期間，張老闆話基本上拍烏蠅，但做過員工嘅張老闆深明好多人手停口停，所以疫情期間無叫員工放無薪假，亦無抄人。而家疫情緩和，生意亦開始好啲。
張老闆當然歡迎大家到訪，但亦希望日星唔係只係一個博物館，佢希望大家可以多認識傳統鑄字技術，因爲佢覺得鑄字嘅字體同電腦印刷字係完全唔同，佢希望可以保留漢字傳統字形，保留漢字嘅精華。
後記：如果係 google 搜尋，你會發現好多到訪嘅人都話日星「好惡」，拎起嘅字粒唔準放低，但相信好多人都係因爲唔了解所以有咁嘅感覺，希望今次嘅故事有俾大家更了解日星同鑄字技術。下次有機會到訪台北嘅讀者不妨都試下去尋寶。
日星鑄字行
有故事的人 Story Teller | Kenry Lee 