前言: 每個人擁有嘅外在條件都唔一樣，當你嘅條件無其他人咁優越嘅時候，你會選擇自怨自艾? 定係仍然堅持，將自己嘅潛能發揮出嚟? 今次嘅有故事的人世豪雖然未必可以用言語表達自己，但可以用畫畫我手畫我心，將自己嘅想法表達出來，媽媽亦會分享作為照顧者嘅故事。
｜初接觸沙畫之路
世豪媽媽以前都會同世豪係展能藝術會參加唔同課程，有一次見到有沙畫體驗就同呀仔一齊參加，就係咁樣一次體驗就令世豪踏上沙畫家之路。問世豪媽媽沙畫有啲咩咁吸引世豪，佢話係沙畫嘅神奇同不斷變化，運用沙箱單靠沙可以畫出好多作品。
世豪嘅故事特別之處係除咗佢自己，媽媽都係一個沙畫導師。媽媽分享以前學習沙畫好多時都會陪同世豪一齊上堂，亦見到陪伴下佢有更好表現，一開始只係興趣，後來仲成為導師。媽媽講笑話，細個無錢學畫畫，而家反而補償返。佢地一路學，後來開始有唔同組織邀請佢地分享，所以就喺唔同學校同機構分享佢地嘅故事，同埋教授沙畫。
｜過程辛苦但享受
世豪媽媽分享同世豪一齊做沙畫家出去教班同做分享其實過程有時都會感到攰，因爲同時係家庭主婦嘅佢要兼顧屋企其他成員嘅需要。去準備每次分享亦頗操勞，因爲每次要帶備嘅道具其實好多，由沙箱、沙、甚至攝錄機同電線世豪同媽媽都一一準備好。
雖然係咁，媽媽表示佢而家做緊嘅工作係開心的，因爲每次台下觀眾嘅反應，家長嘅回饋，都令世豪媽媽好有滿足感，希望自己嘅分享可以幫到其他人，亦希望可以透過佢地嘅故事鼓勵其他要照顧智障兒童嘅父母。
｜給年輕人的話
同世豪媽媽一直溝通，都好感受到佢對年輕人嘅關心，會想了解佢地而家在學期間面對嘅問題。「我地嘅同學有時無咩目標」呢個係我嘅回覆。世豪媽媽話「一定要有目標呀！好多小朋友都係溫室長大，好多都無受過咩苦，但如果真係遇到苦的話記得要從中學習」。世豪媽媽鼓勵年輕人應該多去做義工，因爲咁樣會更加明白同了解不同人嘅需要。「有時可能教班嘅小朋友入面有孤兒，我會準備多少少零食，簡單一個心意佢地已經好開心」，嘗試去明白同了解其他人嘅需要好重要。世豪媽媽覺得幸福唔係必然，年輕人們要多發掘多探索自己嘅興趣同能力，唔好浪費自己嘅潛能。
｜給同路人的話
眼前嘅世豪媽媽分享自己同世豪嘅故事時講得好輕鬆，但背後經歷過嘅辛酸只有佢地一家人知道。好記得世豪媽媽分享好早期見到世豪係馬桶洗手嘅時候仲覺得好搞笑，後來觀察先知道世豪背後嘅需要。係香港我總覺得好多照顧者感覺無咩希望，所以最後邀請媽媽為同路人勉勵。
「耐心同容忍係必須的，因爲始終智障小朋友或者其他有特殊學習需要嘅小朋友未必咁懂得表達自己，大家要努為佢地嘅生活技能作訓練」。
世豪媽媽分享家庭嘅角色好重要，「千其唔好孤軍作戰，第一家庭要團結，大家要一齊去面對，真係覺得無助的話記得尋求專業人士嘅幫忙，我地當時都係遇到一個好嘅教育心理學家分享點樣去教育世豪我地先順利啲」。
媽媽最後勉勵同路人一定要多陪伴，係佢地學習過程要多陪伴，另外要多學習點同自己小朋友相處，例如可以多去講座聽其他人分享如何相處，如何教導。
結語: 世豪當日係學校早會分享，喺幾首音樂嘅襯托下，將一個又一個嘅故事透過沙畫同學生們分享。「天生我才必有用」，條件「較好」嘅我地又有無好好珍惜，好好發揮我地嘅能力呢？希望世豪嘅故事都會讓大家有反思。
如果讀者想更了解世豪嘅故事，可以進行延伸閱讀：
(1) 保記名人堂·專訪沙畫藝術家世豪
(2) 好媽媽付出一輩子，和中度智障兒子一同成了沙畫導師
有故事的人 Story Teller | Kenry Lee 