#111 CitiScent | 市聞香舍

前言：人對氣味係敏感的，好多時候不經意一個味道就會勾起某一個回憶。如果要你為係香港嘅回憶揀選一個味道，會係啲咩呢？今次邀請到 CitiScent 市聞香舍兩位負責人 A 同 D 同我地分享佢地品牌嘅故事。

｜一份送俾好友嘅心意

香港市面其實不乏自家香水品牌，但點解 A 一開始會想以香港味道為中心呢？

「呢幾年其實身邊好多朋友都離開香港，當時大學 year 3 嘅我想送一份特別啲嘅禮物俾我嘅朋友，然後覺得如果離開嘅香港人可以帶住一點香港味道的話，掛住呢個地方嘅時候可以噴下香水回味以前嘅片段。

A 本身都鍾意研究香味，研究香水，有時會將唔同味道同唔同地方聯繫起嚟，例如係學校操場嘅味道同雪糕車甜筒嘅味道。A 覺得氣味好難去捕捉，但往往會令人回想過往嘅片段。A 希望可以透過品牌將一啲佢覺得印象深刻或者溫馨嘅回憶同大家分享。

｜香港的四季與日夜

CitiScent 以香港四季及日夜作主軸，佢地其中一個產品容量係 30ml。「我地望過下啲數據，香港人每季大概用 20-30ml 香水，所以我地設計四季嘅味道，感覺係陪住香港人渡過一年」。「我地希望用氣味去紀錄時間，同大家一齊漫遊香港，重拾不同的記憶」。

CitiScent 產品有一款我覺得好特別嘅白蘭花味，一聞到就會回想係街成日都會有啲老人家係街擺賣清香嘅白蘭花；另一款都好代表到香港嘅係香片嘅味道，鍾意去酒樓飲茶可以話係香港人其中一個集體回憶，所以 A 同 D 決定將呢個味道作為其中一個賣點。

｜親力親為，由設計到銷售包辦

A 對於細節非常講究，務求要將最好嘅產品呈現俾顧客。先從味道講起，佢地想要好啲嘅質素，所以有搵到其中一間幫名牌做香水嘅調香公司幫手，縱然作為新公司一開始無人回覆，反覆嘗試之後成功同呢間公司合作。品牌嘅 logo，甚至香水樽身嘅設計都係 A 一手一腳設計。「我不惱見到名牌嘅 logo 或者字體都會研究下背後想傳遞咩意思，而家有自己嘅品牌，梗係要做得靚」。的確，係 A 嘅講解過程，見到佢花咗好多心思係設計嘅細節，連卡片都係一絲不茍，縱然設計並唔係佢嘅強項，但不斷學習嘅佢設計出好多品牌嘅細節。

A 同 D 兩位係中學同學，佢地係品牌有各自嘅工作，A 主力做香水研究，同其他單位開會，而 D 就主力向外做推銷，做 marketing。問兩位創業係咪佢地大學期間嘅計劃，佢地都話創業其實唔係佢地嘅計劃之內，而剛好兩位中學同學又打算拍住上，做好 CitiScent 呢個自己嘅品牌。

｜顧客與前輩的認同

A 同我地分享其實品牌正式推出前用咗兩年時間籌備，希望將所有嘢準備得最好。問 A 同 D 有無咩有趣事，佢地分享咗幾個畫面。A 話「第一個畫面係品牌第一次擺檔，嗰次我地嘅貨全部賣曬。首次面世，難免緊張啲，有個客同我講唔使手震，我地一定會成功的」。見到品牌嘅受歡迎，A 同 D 當然雀躍。

A 分享另一個畫面「我地今年遇到一個都係做香港香水品牌嘅前輩，佢有係我地檔停留，仲肯定我地嘅努力」。

知道有啲顧客選擇 CitiScent 作為佢地第一個香水品牌，或者表示鍾意品牌推出嘅香味，甚至有顧客從海外落訂單，都令A 同 D 非常鼓舞。

｜其他城市的味道

問兩位 CitiScent 的願景，佢地希望品牌唔止推出屬於香港嘅香水。佢地希望探索其他城市嘅味道，再推出其他香水，期望做到「一城一系列」。

｜俾香港人的話

創立品牌的初心係想送一份禮物俾移民嘅朋友，問兩位有咩說話想同香港人講，A 話「不論係咪決定移民，如果決定離開嘅人多謝佢地係香港嘅貢獻，希望佢地都平平安安，亦想佢地記住心安便是歸處。我地 Day and Night 嘅 Night 香水，味道好似酒店房間咁，帶到一種舒服嘅感覺俾人，好似置身一個 cozy place咁。縱然有機會係外地，一個 cozy place 就好似屋企咁」。

結語：係市集遇到兩位年輕嘅負責人已經覺得印象好深刻，訪問當日再了解多啲佢地嘅理念之後就更加想俾多啲讀者認識佢地呢個品牌。或者我地改變唔到社會嘅變遷，但希望我地都可以留住我城嘅美好回憶同感覺。

有興趣了解更多嘅讀者可以 follow Instagram @citiscent睇吓佢地幾時有 pop up store 親自去體驗一下香港嘅味道。