#112 阿傑 | 音響工程師

前言：相信好多讀者都有去演唱會嘅經驗，但大家又知唔知道我地聽到嘅聲音其實係歌手嘅聲音外，經音響工程師混音後的作品。一個演唱會嘅成功要靠唔同部門嘅協作，今次就介紹下音響工程師嘅故事。

｜踏上音響工程師之路

或者心水清嘅讀者會覺得，好似無咩聽過香港有相關嘅課程可以就讀，阿傑就分享而家演藝學院有音響工程嘅課程可以讀，至於佢係以前係去新加坡讀書的。阿傑以前對於主流課程無特別大興趣，只係知道自己對 programming 相關課程有興趣，以前只係教會幫過手，係夾 band 嘅過程去觀察工作程序。最後係親戚嘅介紹下，阿傑就去咗SAE 新加坡工程院修讀音響工程。

阿傑話雖然讀咗個課程，但超過 95% 嘅知識都係開始做嘢之後學返來。問阿傑點解畢業後會投身演唱會製作，佢話唱片製作由好多年開始已經開始式微，好多公司而家都唔多願意俾錢出唱片，阿傑深明人類唔可以活係無音樂嘅世界，所以選擇去做演唱會，因爲呢個係一個發展得唔錯嘅行業。阿傑形容嘅工作自己好似一個指揮家咁，係控制台上製作音樂俾觀眾聽。

｜音響工程師嘅工作

究竟音響工程師係做咩嘅呢? 阿傑話好多人以為係編曲，但佢嘅工作其實係歌手唱嘅聲音同不同樂器嘅聲音加上唔同層次同做混音效果。記得稍早前去蔡健雅嘅演唱會，佢一開始就話「今晚沒有 programming」，經過今次訪問就明白多咗，意思就係佢演唱會嘅聲音就係純粹佢把聲同樂器嘅聲音，無任何添加。

阿傑話係演唱會工作最享受嘅係出現佢心目中嘅 magic moment。呢刻係同歌手「合為一體」嘅感覺，阿傑可以領會歌手想表達嘅感受同情緒，好似一齊表演緊咁，佢曾經係另一個訪問講過「呢刻能夠感受血液嘅流動」。阿傑話呢個時刻係可遇不可求，要環境嘅配合，觀眾嘅反應同埋歌手如何演繹一首歌，所有嘢都夾好就係 magic moment。阿傑覺得隨住時間同年紀增長，佢對唔同歌嘅感受同領悟都有變化。

阿傑不否認呢份工作係好講「即時反應」，所以個人係工作時會頗繃緊，而且係整個團隊都會繃緊。阿傑分享以前係學校係一個唔算專心嘅學生，係學校有名嘅「壞學生」，但正正呢份工作嘅高壓令佢可以專注起來。阿傑覺得自己唔係容易交朋友嘅人，但因爲工作緣故識多咗朋友，整個團隊都為住同一個目標努力。

｜大部份「意外」都係意料之內

作為演唱會常客，我見過嘅小意外包括結他無聲，歌手支咪無聲，阿傑就好輕鬆咁話「呢啲都係我地預計有機會出現嘅意外」，佢話呢啲係觀眾眼中可能係「大事」，但團隊對於各種意外都有應對方案，而好多意外其實大家都見怪不怪。

提到早前的 Mirror 演唱會事件，阿傑話為業界帶來好大影響。而家嘅演唱會都要遵守更嚴格嘅規條，所以需要用更多時間去準備一個演唱會。

｜年輕讀者入行方法

阿傑話修讀演藝學院嘅相關課程係其中一個方法，如果唔係可以選擇邊做邊學，因爲而家行業好缺人，好多人都係疫情期間因爲無工開轉咗行，所以只要大家肯學就可以了。

後記：成日去演唱會都會聽到歌手鳴謝幕後團隊，其實一個成功嘅演唱會就好似如阿傑所講，要唔同部門一齊努力，為住同一個目標付出，所以各位讀者除咗支持自己嘅偶像外，仲要多啲欣賞背後付出嘅團隊!