前言：火俾人嘅感覺係有熱情，活力，同埋富創造力。唔知大家有無見過火同舞蹈合二為一嘅表演呢？當中嘅危險度同舞者嘅花式，會令你捏一額汗但又好想繼續睇落去。今次訪問到係蘇梅島做火焰舞者嘅 Lewis。
｜從旁觀察 自學起家
Lewis 原先係蘇梅島一間好出名睇火焰舞蹈嘅餐廳做侍應，一路工作嘅時候就被呢項舞蹈吸引住，好想自己都試下。Lewis 於是自己係 YouTube 自學，練習咗六個月之後，將拍好嘅片俾而家嘅師傅睇，師傅就即刻邀請 Lewis 加入佢地嘅團隊。
問 Lewis 覺得自己有無咩天份幫助到佢自學成功，佢分享以前有跟爸爸跳傳統舞蹈，唔知呢樣嘢有無關係，不過佢覺得要做火焰舞者首要條件得一個，就係要唔好驚。Lewis 話好多學徒其實去擺動道具時都有板有眼，但點火後太驚火嘅熱力或者怕火會燒到自己而完成唔到訓練。佢自己初學嘅時候每日都會用兩三個小時練習，佢話有啲學徒甚至會花更多時間。
｜技術和臨場應變一樣重要
Lewis 除咗分享自己要練習嘅花式，例如係 fire ball 同 snake fire，佢覺得臨場應變都好緊要。其中一個影響火焰舞蹈嘅外在因素就係風。Lewis 話只要風向一改變，擺動嘅動作同方向都要調節，否則就好容易會受傷。佢話有啲舞者因為火舌彈入眼睛要入院治療，可見火焰舞蹈十分危險。
另外一個會影響表演嘅因素就係潮汐漲退。如果遇上水位太高或者浪太大的話，舞者無足夠空間去表演或者個浪會撲熄咗個火，好多時都會因爲呢啲外在因素令表演無法進行。
｜關於火焰舞蹈…
Lewis 話火焰舞蹈其實唔算係一個泰國嘅傳統，只係好多島上嘅一個表演項目。的確，我係其他地方例如峇里島同斐濟都有見過類似表演嘅宣傳。Lewis 話佢地嘅團隊有人會去其他東南亞，甚至係歐洲國家表演。
表演當日嘅隊伍有六個人，只有其中一位係女士，問 Lewis 呢個行業係咪以男性為主，佢話係，可能同個危險程度有關，至於 Lewis 有無試過受傷，佢即係展示手上嘅疤痕俾我睇，要做火焰舞者真係一啲都唔簡單。
當我以為呢個舞蹈係泰國人做舞者為主，Lewis 話其實唔係好多泰國人做呢個行業，除咗當日帶住佢地嘅師傅，團好多舞者都係來自緬甸。訪問完結前問 Lewis 如果要入行係咪唔怕痛就可以，佢總結話「Be brave, don’t give up, don’t be afraid of the pain」。
後記：一直知道有火焰舞蹈呢項表演，但今次係首次近距離觀賞，仲有幸參與咗其中一個互動環節。望住火焰嘅擺動，不禁不斷歡呼，但又同時好擔心舞者嘅安全。下次有機會去泰國，不妨預留一個晚上去欣賞精彩嘅火焰舞蹈。
PS Facebook setting 所限，只可以 post 一段片，大家記得去 Instagram 睇多啲精彩演出!
有故事的人 Story Teller | Kenry Lee 