#114 Pat | 大象照顧員 Elephant keeper

前言：提起泰國，唔知各位讀者會諗起咩動物呢？相信有去過泰國嘅讀者都會見到周圍都有大象嘅圖案或公仔。大象係泰國人好尊重嘅動物，甚至被形容係神聖嘅。好可惜，唔係所有大象都咁好彩好好被人對待，有啲被救援嘅大象會被送去大象保護區 (Elephant sanctuary)，今次就等 Pat 同大家介紹下關於大象同佢嘅故事。

｜大象作為生財工具

大象係泰國好多人心目中有著神聖地位，有啲人覺得大象嘅身軀好似一個錢箱，亦有啲人利用佢地去搵錢，例如係泰國好多地方都有得騎大象，或者係馬戲團表演，但好多時呢啲地方都未必有好好照顧大象，Pat 話佢地照顧緊嘅大象好多都係由呢啲地方買返來。以保護區最細嘅大象 Lucky 為例，只有三歲嘅佢，媽媽被人毒死咗，本身準備被賣走，好在有人通知保護區，佢地即刻阻止咗交易同埋出車去接 Lucky 返去。Pat 話「我地都唔想要去「買」大象保護佢地，希望將來我地唔再需要做呢件事」。而家 Lucky 成日痴住保護區最年長嘅女性大象生活，仿佛有返一點依靠。

被帶去保護區嘅大象唔會即刻同外界人士接觸，照顧人員需要用大量時間陪伴大象，建立信任同關係，講緊嘅時間以年計，所以保護區一開始係無對外開放。「大象可能對人類無咗信任，例如以前佢地成日被人鞭打對人類有戒心，所以我地一開始嘅關係建立唔係咁簡單」。Pat 話大象其實會認人，「所以我地一開始照顧新接嘅大象都會請教返以前嘅照顧者佢地嘅大象有咩喜好，連講嘢嘅語調我地都會考究，因爲唔同地區泰國人講嘢嘅語調都會有啲唔同」。

｜照顧大象的挑戰

提到挑戰，Pat 秒速回答「佢地食好多嘢」。的確，體驗過餵食大象之後你可以估計到佢地嘅進食速度係一日可以食幾多食物。Pat 分享有啲大象初到保護區未習慣會比較有情緒，例如遇上下雨天係佢地無咁鍾意，照顧員會生火等大象們暖啲，亦希望佢地會開心啲。

問 Pat 將大象留係園區嘅野外範圍會唔會有危險，例如係遇到蛇，Pat 話大象們對於呢啲「有害」嘅動物出現好敏感，Pat 話仲見過大象用象鼻執起樹枝攻擊蛇去擊退佢地。

係蘇梅島咁偏遠嘅地方如果遇到大象不適係點處理呢？Pat 話大象們每兩個月就會有一次全面嘅檢查，萬一中間遇到例如係腸胃問題需要搵獸醫的話，獸醫需要由鄰近嘅喀比過去，需要等待一日。

｜大象保護區的願景

問 Pat 保護區長遠有咩計劃，佢分享除咗而家嘅體驗團，仲希望可以係到加一個同大象有關嘅資料館，等遊客，尤其小朋友，嚟到嘅時候可以更深入認識大象嘅生活同生態，學識點樣尊重其他生物，同埋將呢啲訊息同身邊人分享。

後記：記得當日介紹人員分享大象被不友善對待嘅時候即刻覺得好惱，覺得佢地嘅遭遇好慘，亦都有內疚因爲以前細個唔知都曾經試過騎大象。今次係大象保護區嘅體驗好特別，亦感受到照顧人員同大象之間嘅感情，希望將來如 Pat 所料多啲人識得尊重其他動物。