#106 渡部駿 | 京都嵐山人力車師傅

前言：有去過京都嵐山嘅讀者應該都有見過唔同人力車師傅係度月橋附近嘅招徠，今次係第三次到訪嵐山，決定嘗試搵一個可以用英文溝通嘅師傅訪問，了解下佢地嘅工作。

｜百年歷史的文化

渡先生分享人力車係嵐山嘅歷史已經超過 100 年，係日本唔同地方都有人力車。問渡先生有無女士做人力車師傅，佢話係多啲平地嘅地方例如東京係有的，但呢個職業都係以男士為主。

如果你以為體能就係入職唯一要求就未免低估咗師傅們。渡先生話要入職要先通過一個三個月嘅培訓同考試，內容包括體能同埋考核京都有關嘅知識，因為人力車師傅係接載乘客嘅過程需要介紹呢個地方。渡先生話而家其實好多大學生入職，體能應付到以外，仲可能識多啲語言，係接載遊客嘅時候有更大競爭力。

問渡先生辛唔辛苦，佢話當係做運動同體能訓練，所以佢無特別覺得辛苦，但佢比較怕要接載外國人，因為佢地身形比較高大，如果一次要拉兩個的話更加吃力。

｜颱風天以外，風雨不改

到訪嘅日子係冬天，溫度比較低相信師傅們都會無咁辛苦，實在難以想像夏天佢地工作有幾艱辛。「冬天日照短啲，我地工作時數亦會短啲。我地通常秋天紅葉季節最忙碌，會工作大概 12 小時。」渡部駿表示落雨天佢地一樣會開工，只係會乘搭嘅遊客就會少啲，但颱風天因為安全緣故就一定休息了。

問渡先生疫情期間生意有無受影響，佢同上一位有故事的人 Honda San 一樣都認為疫情期間日本人嘅境內旅遊仍然支撐到佢地嘅生活。傾計過程得知渡先生已經拉咗人力車 8 年，佢仲返緊兩份工，除咗拉人力車，就係做影片剪接，非常忙碌。

結語：訪問當日其實先留意師傅們識唔識講英文，再簡單對答確認對方可以英文溝通到。今次係第二次訪問日本人，雖然比平時難啲，好在係有限嘅英文下仍然可以溝通到，表達到佢嘅意思。讀者下次有機會去嵐山的話，可以認識多啲呢個文化。