#115 Frankie | 愛香港的人

前言：一個人對一個地方嘅身份認同有好多因素影響，就算土生土長嘅香港人都可以對呢個地方無感情，同時好多唔係香港成長嘅人好鍾意呢個城市。Frankie 雖然唔係香港長大，但致力推廣香港嘅文化，今次介紹下佢嘅故事。

｜從小認識香港文化

係珠海出世嘅 Frankie 除咗識講廣東話，自細都有聽廣東歌，睇港產片，佢覺得自己都算認識香港嘅文化。大學係北京修讀旅遊管理後，再係香港中文大學修讀可持續旅遊碩士。Frankie 表示自己有考慮去其他國家生活，既然自己咁鍾意香港，就先係同出生地比較接近嘅城市試下生活，睇吓自己適唔適合係其他地方生活。

｜多元的香港

Frankie 覺得香港嘅文化好多元。「香港雖然好細但好多嘢都搵到」，佢覺得係香港好容易就搵到唔同類型嘅人。當日反問佢大城市例如上海應該都有好多外國人生活，Frankie 覺得部份上海人嘅英文水平未必可以好自在咁同外國人溝通，所以佢地未必經常有交集，相反係香港，好多人都習慣講英文，接觸外國文化感覺比較平常，外國人係會比較融入香港。

Frankie 初來香港先住係深水埗，好見到香港繁榮嘅另一面。而佢覺得最代表到香港嘅區域係中上環，佢覺得呢個區嘅氛圍同埋中西文化合壁好特別。

｜香港人的生活

Frankie 話嚟香港之前覺得自己頗了解呢個地方，但嚟到之後發現好多嘢都停留係佢兒時嘅印象，自己親身體驗後覺得香港唔係佢想像咁。佢話為咗令自己更融入呢個地方，佢有逼自己學香港嘅一啲用字同潮語。經過我即場抽問，發現 Frankie 對香港潮語真係幾了解。透過學習語言，Frankie 同呢個地方更感到連結。

問 Frankie 係香港生活咗一段時間，而家覺得自己係咩身份，佢回答係香港人。問佢係幾時開始覺得自己係屬於呢個地方，佢話其實都經歷過一段時間嘅掙扎期。「以前係內地生活嘅時候都會覺得自己某部份嘅價值觀可能同一般內地生活嘅人唔同，但啱啱嚟到香港嘅時候，喺身份認同方面其實好矛盾，覺得自己好似唔屬於香港，但係又已經離開咗內地，再加上一開始冇乜認識朋友，好多問題都係要自己面對同埋解決」。好在經過大概半年時間，Frankie 開始認識到多啲朋友，亦開始習慣喺香港嘅生活。

｜以「香港人」身份推廣香港文化

Frankie 嘅工作主要係帶外國人認識香港，佢通常帶中上環嘅團，遊走於唔同建築同街道令遊客更認識香港。Frankie 分享係帶隊嘅同時都有更了解自己。佢會同遊客分享自己作為新移民係香港嘅生活，講自己嘅故事。佢覺得外國人作為遊客比起本地人無咁多標籤，會更容易講解關於呢個地方嘅背景。

問 Frankie 帶團時有無咩特別事時，佢話「有啲完全唔認識香港嘅人會誤以為我地都實行一孩政策；另外有啲人可能以前曾經係香港工作過，而家再返來覺得香港一路有變化」。Frankie 係帶劏房導賞嘅時候亦遇過有外國人質疑佢地點解要公開低收入人士嘅居住環境，感覺有啲不道德，Frankie 就同佢地解釋係希望透過導賞團令更加多人關注劏房嘅議題，同埋會同外國人講其實好多住喺劏房入邊嘅市民都係默默喺背後幫助緊香港嘅人，例如係清潔人員。

Frankie 希望藉住帶導賞團，可以俾參加者更認識同了解香港嘅過去，現在同將來。Frankie 有感近年嘅香港不斷變化緊，佢希望可以親身見證住香港嘅變遷。早幾年開始興起嘅用詞「港漂」形容一班由內地來港打拼嘅人，Frankie 覺得呢個字已經唔足以形容佢嘅感覺，因為佢已經視香港為佢嘅「家」。

後記：有時係網上見到鍵盤戰士們一面倒鬧，但其實身處係呢個城市，見到香港「變差」大家又係咪真係開心? 同時我亦見到好多人特意嚟香港生活，想係到闖出一片天，其中一個我比較深刻嘅例子就係歌手 Gin Lee，佢為咗更融入呢個地方嘅生活特登去學廣東話，唱好廣東歌。

今次同 Frankie 嘅傾談都有令我反思自己同埋身邊人點睇我地身處嘅家 — Home Kong，希望你睇完 Frankie 嘅故事都有機會反思下自己嘅身份認同感。