或許好多讀者都無聽過 Tiny Island 呢個品牌，但好多人一定見過佢地嘅產品：一幅幅由香港街道組成嘅地區地圖，例如係西營盤同南丫島。今次搵到另一位好鍾意香港嘅 Alexis ，佢會同我地分享佢同 Tiny Island 嘅故事。
｜創立 Tiny Island 的原因
Tiny Island 係 2019 年創立，Alexis 話創立品牌並無一個特別浪漫的原因，只係想慶祝自己係香港生活咗好一段時間，亦都想睇吓每區嘅市民有無好鍾意自己嘅社區，所以就開始用佢喜歡嘅上環同西環開始設計產品。讀設計出身嘅 Alexis 將好多香港元素放係佢地嘅產品，例如係香港地圖嘅雨傘，唔同區嘅街道圖，仲有香港特色嘅明信片同掛畫，佢希望佢地嘅產品要實用。
來自瑞典嘅Alexis 覺得香港係一個好特別嘅城市，同歐洲好多地方都唔一樣。係香港搵到殖民地時期嘅歷史，亦深深感受到呢個地方嘅多樣性，認識到好多唔同嘅人。
｜充滿「香港味」嘅產品
我對 Tiny Island 印象中最深刻當然係唔同區嘅街道圖，仲有香港地圖嘅毛巾同雨傘。而 Alexis 自己最鍾意係一個仿中環荷李活道渠蓋嘅杯墊。Alexis 分享有啲產品佢自己好喜歡，花唔少時間設計，但銷售量就一般。不過，佢話佢抗拒只生產客人想買嘅產品。
Alexis 生活咗係香港一段時間，同唔同小店都有聯繫，所以佢好多產品都同小店合作一齊生產，例如佢地嘅蠟燭係西貢生產，成件事都係「香港製造」。
｜帶走「香港」
早幾年身邊好多朋友同學生離開香港，我都會去 Tiny Island 選購禮物，希望要走嘅人都帶住一點回憶離開。例如朋友同學生移民去多雨嘅英國，我就會買雨傘，又試過買香港麥理浩徑嘅毛巾俾鍾意行山嘅學生。
Alexis 都話好明顯早幾年移民潮嘅時候好多人都會特登搵佢地買臨別禮物，或者係買一啲有「舊時香港」特色嘅產品。
Alexis 分享其實而家品牌先開始體驗咩叫「正常」。係移民潮同疫情都穩定之下，佢地都要觀察下點幫品牌調節銷售定位，例如部份產品係俾本地香港人，亦有啲產品係俾鍾意香港嘅遊客選購。
後記: 移民潮之前已經認識 Tiny Island 呢個品牌，早幾年好多時候都會去 Tiny Island 買禮物，因爲覺得佢地嘅產品好有香港特色，好代表到香港，亦適合送俾要離開香港嘅朋友。希望係外國嘅朋友同學生見到呢啲產品都會諗起係香港嘅回憶。Alexis 係訪問完結前話 “I’m not a souvenir brand, I’m the one who makes memories”.
如果有興趣了解更多 Tiny Island 嘅產品，歡迎大家瀏覽 Instagram @tinyislandmap 了解更多。
有故事的人 Story Teller | Kenry Lee 