前言: 「求學不是求分數」係好多八九十後都耳熟能詳嘅政府「宣傳口號」，講好容易，但相信對係香港讀書制度嘅學生同老師一啲都唔容易做到。執教鞭超過十年，回顧自己最鍾意遇到嘅其中一類嘅學生正正係對知識有好奇心，有追求，不單純為分數嘅學生。十年過去，呢種學生唔常見，究竟呢類學生係香港讀書會點? 今次邀請咗最近一位畢業生 Tony 同我地分享佢嘅故事。
｜自少對科學有濃厚興趣
Tony 對於童年印象其中一樣最深刻嘅就係屋企不斷重播國家地理雜誌嘅片，當時佢只有 5-6 歲，片中係唔同關於大自然嘅現象，自個陣開始 Tony 覺得自己對自然科學開始有興趣。Tony 細個亦有閱讀好多圖像嘅習慣，導致佢係中學讀書上堂或者溫習嘅筆記都會用好多圖像。
Tony 細個嘅時候有科學上嘅問題都會請教一個親戚，到大個啲就開始自己係網上搵答案，逐漸令佢決定高中要選修理科科目，尤其係化學。Tony 有感「細個嘅時候大家成日都會問點解，但隨住年紀增長，大家都唔再問問題」。
問 Tony 佢對科學嘅興趣同屋企有無關係，佢話屋企對於佢嘅興趣好支持，除咗係 Tony 童年時經常帶佢去博物館，我訪問聽到最深刻係以下片段：「我地學校做 lab 成日都係二人一組，我都無咩機會好好研究，我同屋企講，佢地買咗一 set 儀器俾我係屋企自己玩」，教咗咁耐書，屋企擁有一套實驗室儀器我真係第一次聽，亦感受到 Tony 屋企對佢嘅支持。
｜學習方式的探索
「自少對科學有興趣，最後公開試一帆風順」並無出現係 Tony 嘅身上，相反，佢經歷一次又一次嘅打擊。由中四開始，已經見到 Tony 放好多時間同心機係化學科，但原來 Tony 一路都有感覺付出同回報唔成正比，呢種挫敗感越高年級越嚴重。縱然 Tony 好努力，佢化學科成績一直都平平。去到中六，Tony 更加有少少「走火入魔」咁讀化學，影響時間分配。可惜最後公開試成績都係未如理想，加上中文成績欠佳，所以最後入讀香港大學副學士科學課程。
縱然不斷經歷挫敗，並無消減 Tony 對化學科嘅興趣，但吸收公開試「失敗」嘅經驗，Tony 有好好反思自己嘅讀書模式。「回想返其實我以前中學無咩溫書。我上堂有專心，但我好多時聽完覺得明白就算，課後我無再花好多時間溫習，到做 past paper 個陣就發現成日都拎唔到重點，同埋我無咩心機去鑽研考試技巧」。去到副學士，其中一位老師提議同學試下每次用一張紙去寫低每課重點，Tony 決定試下。「我每次落堂之後都會花 4-5 小時去整理筆記，呢個過程耗時係因爲我需要消化教過嘅知識，望返筆記外，仲會睇參考書，或者係 YouTube 搵答案」。Tony 表示有係公開試上咗一課，修訂讀書方法後，最後 Tony 係副學士第一年奪得優秀成績，來年九月係香港大學正式入讀理學士，繼續追夢。
｜從失敗中學習，迎難而上
Tony 覺得經過 DSE，自己有成長咗。DSE 要兼顧唔同科，凡事都要透徹明白的Tony 無咁多時間去消化；去到副學士之後可以全心研究自己喜愛嘅化學。DSE 的失敗，Tony 有自責，亦有經歷唔開心嘅日子，慶幸 Tony 內心嘅聲音提醒佢只係唔開心無用，佢需要面對現實，於是推動佢去搵方法進步。Tony 雖然比同年朋友讀多一年副學士，但佢好正面咁睇呢個經歷「被公開試淘汰與其話係失敗嘅經歷，其實更似係搵到一個行唔通（上唔到大學）嘅方法，而且我會比來年讀大學嘅學生多一年經驗，亦係今年一般讀書氣氛下學會自強。
｜給同路人的鼓勵
Tony 第一句就答我「要保持好奇心」，要問多啲問題。佢鼓勵未能係公開試成功嘅同學仔唔好氣餒，遇到挫折感到唔開心之外，仲要識得企返起身，諗下點樣幫自己。最後，Tony 以呢句說話結束訪問「因爲熱愛，所以堅持，有熱誠咩障礙都可以克服」。大概係 Tony 身上正正驗證咗佢對化學嘅熱愛。
結語：當年Gap Year 離開學校前同全校分享「希望同學唔好只顧考試，大家考試以外對每一科仲有無熱愛? 其實追求知識同考好公開試無衝突」，係 Tony 嘅分享中，會見到有啲同學雖然係香港呢個制度雖然未必好容易行，但搵到一樣自己有興趣鑽研嘅事唔容易，期待 Tony 係大學會搵到自己嘅一片天，亦寄望其他讀者「讀書不只求分數」。
有故事的人 Story Teller | Kenry Lee 