#119 Pat | 《Store on the way 旅遊雜貨》店主

前言: 前陣子經過朗豪坊見到市集有其中一檔賣好多世界唔同地方嘅精品，傾談之下發現店主原來既鍾意旅行，又鍾意買精品，於是開咗 Store on the way 旅遊雜貨，今次請 Pat 同我地分享佢嘅故事。

｜蓄勢待發 等待時機

Pat 本身去旅行鍾意搜集磁石同明信片，大概2015年留意到唔同國家都有自己好靚嘅精品，亦覺得唔係全部人都有能力或鍾意去旅行，於是就開始蒐羅富當地特色嘅產品。紀念品就已經買咗一個紅白藍膠袋咁大，但係有開舖念頭嘅 Pat 一直只係處於計劃階段，直至兩年前疫情出現，Pat 正職受影響，大部份香港人又無得去旅行，所以佢決定實行開舖計劃！

Pat 第一次擺市集係疫情期間，反應好好。「唔知係咪因爲大家都無得去旅行，見到異地嘅精品特別有興趣」。Pat 係之後嘅市集有設立唔同地方嘅主題，例如係埃及嘅精品，或者係日本嘅精品，好多粉絲都會見到 Pat Instagram 更新會特登到場支持，亦有對某國家好有研究嘅粉絲到場同 Pat 討論或者分享佢地買過嘅精品。精品全部都係 Pat 精心挑選，會唔會被人買咗佢嘅心頭好呢? 「如果係我好鍾意嘅精品我會買兩件，一件自己儲，一件擺攤賣」。

｜望精品遇到知音人

問 Pat 蒐羅產品嘅時候係選擇佢覺得靚定係多顧客鍾意嘅產品，佢話係取一個平衡。本身有正職嘅 Pat 覺得而家自由身嘅形式令佢相對賣嘅產品唔使只從商業角度考量。「我希望同唔同人分享自己鍾意嘅精品，係舖頭搵到嘅錢當係津貼一點旅費，亦唔希望呢個興趣會變質」。

Pat 分享其中一對係土耳其帶返香港嘅耳環：「呢對耳環係一個當地人係 camp site 到搵松木再手造的，獨一無二，我最欣賞係佢用大自然嘅材質去造佢嘅手工藝品」。Pat 有試過係市集展示一個立陶宛買嘅木首飾盒，有位女士想講價，又質疑佢個盒嘅出產地，「你可以唔買，但你唔好因爲想講價就質疑我嘅產品」，當然 Pat 企硬無降價，佢希望佢嘅產品都賣俾識欣賞嘅顧客。

｜公開試非一切

當我介紹我個 page 設立嘅原意嘅時候，Pat即刻話佢身同感受。同好多學生一樣，Pat 屋企人建議佢高中揀理科，但去到高考對於深奧嘅數學完全唔理解，最後未能成功入大學。Pat 之後完成同旅遊相關嘅文憑課程同自資大學學位，佢回望返自己嘅經歷慨嘆讀書並唔係一切，「雖然我公開考試唔成功，我仍然搵到我好鍾意做嘅事，好享受去世界各地感受風土人情」。

後記: Pat 話佢嘅目標係賣曬佢儲落嘅產品，繼續去探索未去過嘅地方，仲有多啲係市集同有緣人互動。唔同人去旅行都有自己嘅目的，唔知對你而言旅行嘅意義係咩呢?

有興趣了解更多嘅讀者可以 search and like Instagram @store_on.the.way。