#73 梨子 | Cosplayer

前言：Cosplay 呢個字同文化相信大家唔會陌生，有時候係街亦有機會遇到 cosplayers 影緊相，究竟呢班 cosplay 愛好者諗緊咩呢？佢哋又希望其他人點樣看待 cosplayers 呢？今次搵來我荃灣舊生梨子分享。

1. 你係由幾時開始接觸 cosplay？一開始點解會接觸嘅？

其實我中一/二嘅時候已經認知 cosplay 呢個文化，但從來無諗過自己有一日會試。直至 2017 年暑假嘅動漫展，我有個朋友去表演，佢邀請埋我去玩，於是我就開始接觸 cosplay。

K: 一開始朋友邀請有猶豫嗎？因為係一樣從未試過嘅興趣？

一開始我有驚的，因為呢個興趣好似比較小眾，而且我又係一個新人去加入人地圈子，所以都猶豫，不過朋友三番四次邀請我之後我決定試下。

2. Cosplay 背後嘅基本理念係？有無一啲常見圈外人嘅錯誤觀念？

Cosplay 嘅理念係要放低自己嘅身分，變成第二個人。好多人因為愛某個動漫角色，就想變成佢咁。

但我觀察而家有啲變質，與其係變成鍾意嘅角色，有啲人會因為某個角色比較出名或者打扮性感而變成個啲角色嘅造型，因為咁樣可以令佢哋出名，好似 KOL 咁。

好多人會覺得 cosplay 等於賣肉，但好多時其實係傳媒集中影一啲性感打扮嘅 cosplayer，而女角色通常會受歡迎啲，所以有啲屋企會反對仔女 cosplay 因為驚會太性感或者會識到壞人。

有啲人會覺得 cosplayers 好另類，不設實際，做嘅嘢對生活無幫助，但唔係每樣嘢有成果有幫助先做，好多香港人只會諗賺唔賺到錢。

K: 咁有無 cosplayers 可以靠呢個興趣搵錢呢？

只會一啲好出名嘅人先有機會賺錢，佢哋會出寫真集，亦會有周邊商品，至於其他人屬於業餘性質。

K: 咁你一開始嘗試嘅時候屋企有無反對？

我地呢個圈子好多人係「地下黨」，唔敢俾屋企人知，我一開始都係地下黨的，有一次俾屋企見到我個假髮，可能因為我已經中學畢業，所以佢哋接受到。

我覺得自己有無分寸好重要，要知道咩場合應該著咩衫。

3. Cosplay 係香港嘅普及程度 (1-5)？有無遇過任何歧視/不禮貌對待？

我覺得普及度的話 2-3 分，而公眾接受嘅程度3-4 分。

基本上我好多時去影相都會遇到不禮貌對待。有一次我嘅打扮稍微性感，有個人好刻意咁行埋嚟影我相，又會有人拍片，最惱係當我話佢嘅時候，呢個人扮無野。但其實只要大家有禮貌問下，我相信 cosplayers 都樂意影相。

K: 有無因為咁樣而令你唔想再繼續？

咁又無，因為錯嘅係啲人，而唔係件事本身。其實而家好多年輕父母帶埋小朋友出街，都會好奇問我地做緊咩，或者想影相，唔會話無禮貌無問過就影我地。

4. Cosplay 令你最有滿足感嘅係？

我覺得係自己開心同有人認同你。當你好辛苦準備，然後有人讚賞，話個感覺或者件道具好真嘅時候，真係好大嘅滿足感。我試過整一件道具整左個零月，有時真係唔簡單。

K: 咁啲道具有無人教你點整呢？

有啲係朋友教，有啲我睇 YouTube 自學，或者係俾錢其他人幫我整。

K: 點先為之 cosplay 得好呢？有咩準則？

我地強調「還原程度」，包括化妝、神髓、道具或氣質等等。

K: Cosplay 會唔會要用好多錢呢？因為有時啲道具只係用一次？你覺得中學生適合開始 cosplay 嗎？

要睇吓你準備到咩程度，大概 $300-$4/5000。有啲人係鍾意平啲投資，但嘗試多啲角色，好似集齊扮演唔同角色咁。

我覺得中學呢個階段未必適合 cosplay，因為錢嘅考慮都幾重要，同埋有啲中學生心智可能未夠成熟，明辨是非嘅能力可能未夠高，有機會識到壞朋友，有啲人甚至因為 cosplay 而去借錢。

同埋有啲學生太年輕但想嘗試一啲十八禁嘅角色都唔係咁合適，所以我建議中六畢業後先開始比較理想。

5. 關於呢個文化，有咩想同身邊人/讀者分享？

我覺得有啲嘢你自己無試過的話，唔好用有色眼鏡去看待其他人，有啲嘢可能唔係人地講到咁差。

其實 cosplayers 都係一般人，只係我地嘅興趣可能同其他人唔同，係某啲時候超現實。

最後希望大家成熟啲先加入，因為真係用幾多錢的。

後記：離職當年已經想訪問一個 cosplayer，後來諗起其實自己好多舊生都有 cosplay，所以造就左今次訪問。今次嘅訪問令我對呢個文化認識多左，亦希望各位讀者可以了解更多，尊重其他人嘅興趣。

#cosplay #cosplayer

• 

•